Shillong, Nohprah 14 : Ka Nongkseh Sports Social & Cultural Club kala thaw histori ha ka lympung ialehkai ka Shillong Sports Association (SSA) da ka jingiohrah ia ka nam lahduh ne Champion ka SSA Chamions Cup 2025-ka lympung ialehkai ba nyngkong eh, khlem ka jingshah rem shisien ruh, kaba la bteng naduh ka lympung ialehkai 1st Division.
Kane ka Champion ka SSA 1st Division, kala pynliem ia ka club ramhah-ka Shillong Lajong FC kaba dei ka Champions jong ka Meghalaya State League 2025 bad ka Super Cup 2025- ha ka jingiakhun phainal ha ka sngi Saitjain. Ka Nongkseh kala pynliem ia ka Shillong Lajong da 2-1 kol bad ka kol ba khatduh kala wan ha ka minit ba khatduh jong ka Extra Time.
Lah ban kdew hangne, shuwa kane, ka Nongkseh SS&CC kala pynliem ia ka Champions jong ka lympung ialehkai Shillong Premier League (SPL)-ka Langsning SC ha ka jingiakhun jongka semifinal lyngba ka tei breaker.
Ka Nongkseh SS&CC kala thaw record ruh kum ka kynhun kaba ialehkai khlem ka jingshah rem ha ki artylli ki lympung ialehkai ka SSA ban iohrah ia ka nam Champion- kaba nyngkong ka dei ka SSA 1st Division bad sa ka SSA Champions Cup. Kane ka jingjop kala pynlong ia ka Nongkseh ban jop haduh 15 tylli ki jingiakhun khlem ka jingshah rem katba ka Shillong Lajong kala liem noh hadien ka jingjop lynter ba 16 sien.
Haba phai sha ka jingiakhun final ka Champions Cup, ka Shillong Lajong kala lam shakhmat ha ka jingiakhun da ka jingioh ban thep nyngkong ia ka kol ha ka minit ba 27 lyngba u Babysunday Marngar, kaba lawan na ka jingbakla jong u Ban pynkhrawnam Nongkhlaw, uba la pyrshang ban shu ia ka bol shajngai bad poi pynban ha ki kjat u Baby.
Ka Nongkseh kala pyni ia ka sap ialehkai kaba itynnad khamtam ha ka short passing bad dei ha ka injury time, u Kynsaibor Lhuid (90+4) ula ioh ban pyniakhaid hashuwa ba u Hardy Cliff Nongbri un pynioh pat ia ka kol jong ka jingjop ha ka minit ba 120.
Ka Shillong Lajongkala pyni kumba ka lad ban pule ia ka Nongkseh kumba pule kot ha ka kylla step jong ka jingiakhun- ka rukom antad ia ka rukom ialehkai ka dei ka bym lah thew satia bad kila lah ban antad lypa ia jan baroh ki sienjam jong kane ka kynhun liang pyrshah.
Hynrei kaei kaba pynkylla ia kiei kiei baroh ka dei ka jingwanrah ia u Shano Tariang ha ka kylla miet jong ka jingiakhun da u Coach Richard Nongneng. U Shano, lada kynmaw bha, u dei u bym pat ju sei madan ha ki jingiakhun ka Champions Cup, lehse namar ka jingbym don ha ka met kaba khlain. Hynrei daka jingmih jong u, kala pynlah ia ka Nongkseh ban tehla kam ia ka rukom ialehkai ba hapdeng bad plie ia shibun ki lad ban ioh thep kol.
Ka Shillong Lajong kala pynsuki ia ka jingialehkai kumba la khmih lynti-la I kumba u Physio u dei uba bunkam eh ha madan. Hynrei u Fourth Official ula aipor namar kane haduh 8 minit jong ka por pynwai bad dei ha kane ka por ba u Kynsaibor ula ioh ban pynkiakhaid da kol kaba don hakhmat ka jaka shong bala buh kyrpang ia ki nongkyrshan ka Nongkseh bad ialam ia ka jingialehkai sha ka extra time.
Ka jingiakhun ia ka extra time kala iakhaid bha bad hashuwa ban poi ka por ban leit noh sha ka tiebreaker, u Kynshai ula pyllait ia ka bol sha u Shano, uba la pyrshang ban shut ia ka bol sha ka kol lane pyllait iaka bol sha u Hardy uba la ioh pat ban pynkhih ia ka jar.
Lada ka Nongkseh ka dang lah ban pynneh ia ki rang ialehkai kiba don sap, kan dei kawei na ka kynhun kaba khlain bha ban ialehkai ha ka Shillong Premier League jong ka samoi ban wan (hadien ba kiew na ka nam Champion ka First Division 2025). Ka jingsynshar jong ki Lai tylli ki Club ramhah-Shillong Lajong, Langsning bad Mawlai- ka lah ruh ban dei kaba kut.
Ha ka jingsam khusnam, kaba la wan iashimbynta da u Myntri kam ialehkai ka Jylla Bah Wailadmiki Shylla kum u kongsan, u Kynsaibor ula shah jied kum u Hello Meghalaya Player of the Final. Ki don lai ngut kiba iasam ia ka khusnam Top Scorer bad tang u Riborlang L Lyngkhoi (6 kol) ka Shillong Lajong uba don ha madan ban shimti ia ka khusnam.
 da ka jingiohrah ia ka nam lahduh ne Champion ka SSA Chamions Cup 2025-ka lympung ialehkai ba nyngkong eh, khlem ka jingshah rem shisien ruh, kaba la bteng naduh ka lympung ialehkai 1st Division.){kind=link}