Shillong, Risaw 09 : Ka Meghalaya Police ka la pynthikna ialade ban ioh jaka haka lympung SSA Super Cup hadien ka jinglah ban pynliem ia ka Laitkor da 2-1 ha ka jingialehkai ba khatduh jong ka, ha ka Shillong Premier League 2026 hynne ka sngi ha SSA Stadium.
U Everestarly Rynjah (41’, 69’) u la thep ar kol na ka bynta ka MLP bad u Shelbilkstar Kharshilot (90’+2) u la pynphai kylla shikol shwa ban wai na ka bynta ka Laitkor.
Ka MLP mynta ka la kamai 14 poiñ, ha kaba ka la ïoh biang ban knieh ïa ka kyrdan kaba san na ka Sawmer (12 poiñ), kaba la kham biang naduh ba ka la wanphai biang sha ka SPL naduh u snem 2018. Katb ka Laitkor, watla ka la pyrshang ban ialehkai bha, hynrei ka la wan sha ka kyrdan bakhyndai bad kamai 6 poiñ bad kan hiar noh sha ka First Division ryngkat bad ka Mylliem, kaba la wan ha ka kyrdan ba shatrai.
Watla ka tip ba kam lah ban lait na ka jingshah pynhiar kyrdan, hynrei ka Laitkor ka la ialehkai bha ha kaba ka la ioh ia kibu kiba biang.
Ha ka minit kaba 34 u Kitdor Kharphuli u la iarap pynbuh na ka bynta u Samborwell Mynsong, hynrei ka bol ka la leit dei na diengkol.
Ka MLP ka la ioh ia ka kabu kaba biang hadien hynriew minit ha kaba u Rapborlang Marwein u la ioh ban pynbuh bol bad u Everest u la lah ban pynkhih jar.
Wat hapdeng ka jinghap slap kaba jur, hynrei kam shym la pynthud ia kane ka jingialehkai. U Bisharlang Kharumnuid u la ioh ban shut ha kaba ka la leit dei na dieng kol lyngba ka free-kick hadien 10 minit ba la sdang ia ka kylla miet bad u Marbiangki Suchiang um shym la.lah ban pynurlong.
U Everest u la thep kol ha ka kol kaba ar, lyngba ka jjngiarap pynbuh bol na ka bynta ba na ka diang. Ka Laitkor ka la pyrshang ban iengskhem ban pynphai. U Gerald Kharbyngar bad u Samuel Suting ki la ioh ban shu hynrei kim shym la lah ban thep. Kumjuh u Eddiesius Kharkongor u la ioh ia kabu kaba biang hynrei u rangapkol ka MLP u Eveningstar Bareh u la lah ban pyllait na ka jingshah thep.
Lashai ka sngi kan dei kaba kut jong kane ka lympung SPL 2026 ha kaba ki kynhun kin hap ban rai ym tang ban rung sha ka SSA Super Cup (Top 6 ha ka SPL) hynrei ban IOH rung sha ka SSA Champions Cup (Top 2).
Ha ka por 1pm kanShillong Lajong kan iakhun pyrshah ia ka Rangdajied United, kaba don ha ka kyrdan ba hynniew. Ka jingjop kan pynthikna ia ka Lajong ban wan ha ka kydan ba ar.katba ka Nongkseh ia ka Langsning ha ka por 4:30pm. Kane ka jingiakynduh ka long ka jingbteng kumba long ha ka final jong ka Meghalaya State League ha u Jylliew mynta u snem.
