Shillong, Risaw 13: Ka Shillong Lajong ka dang ap satang kawei ka jingiakhun ban ioh bat biang iaka nam lahduh haka Shillong Premier League hadien ba ka la pynliem noh ia ka Nongrim Hills da 5-0 kol ha SSA First Ground Polo.
U Wilbert Marbaniang (7’), Deibormame Tongper (45’+3), Ricky Kharkongor (57’, 68’) bad u Banlamkupar Rynjah (60’) ki la thep kol ha kaba ka Lajong kala jop da kaba suk pyrshah ïa ka kynhun kaba don ha trai duh jong ka SPL 2025.
Da kane ka jingjop ka Lajong kala la ioh 18 poiñ hadien 8 tylli ki jingïakhun bad ka tam 1 poiñ ïa ka Langsning katba ka Nongrim Hills kaba don ha trai duh jong ka SPL 2025 ka dang ioh tang 1 poiñ na ki 8 tylli ki jingïakhun.
U Wilbert u la thep kol daka khlieh iaka kol ba nyngkong ha kaba sdang ka jingïalehkai hynrei ka SLFC ka khlem lah ban shim kabu haba ka ioh lad hynrei katba ka Nongrim Hills, ka la ïoh tang khyndiat eh ki lad ban thep kol.
Ka Nongrim Hills kala jan ioh thep kol hadien ba u nongapkol ka Lajong u Wanteilang Malngiang u la lait ban kem iaka bol haka jingshut korner hynrei uwei u nongïalehkai dien ka Lajong u la lah kynjat noh iaka bol.
U Kitboklang jong ka Ljong ula shut bad ka bol kadei ha dieng kol kaba ailad ïa u Deibormame ban thep suk ban iarap iaka Lajong ban tam da 2-0.
Ka Nongrim Hills kam shym la don lad satia ban wanphai, ha kaba u Ricky u la thep ar sien ha ka kylla miet hadien kata u Banlamkupar u la thep sa kawei ka kol na ka bynta ka Lajong.
Ka jingialehkai ahka 14 tarik kan long hapdeng ka Malki pyrshah ia ka Langsning ha ka por 4:30 janmiet bad kane kan dei ka jingiakhun kaba khatduh jong ka Langsning ha ka SPL 2025, katba ka Malki kan don sa kawei ka jingïakhun.
