Shillong, Iaiong 15 : Ka Iingkashari Meghalaya High Court ha ka sngi Balang, kala pyntip ba kala ioh pdiang ia ka kaiphod jingtohkit jong ka Special Investigation Team (SIT) halor ka jingbthei ka par dewiong ha Mynsngat-Thangsko, East Jaintia Hills, kaba shim ia ka jingim ki palat 30 ngut ki nongbylla bad ong ba ia kane ka kaiphod yn wan pynrung ha ki jingthoh hashuwa ka sien shong bishar ban wan.
Ia kane la pyntip da ka Division Bench ba kynthup ia u Justice HS Thangkhiew bad Justice W Diengdoh haba shong bishar ia ka mukotduma suo motu halor ka jingtih dewiong beain hapoh ka Jylla.
Ha ka hukum, ka Iingkashari kala pynpaw “Hadien jong ka hukum ba 05.03.2026, la dep file ia ka kaiphod jinglong jingman ba mynta. U A Kumar, Advocate General ula pyntip ba la ioh pdiang ia ka kaiphod ka SIT, bad ia kane yn sa wanrah ban buh ha ka jingthoh ha ka sien shong bishar ban wan”.
Ha ka 12 tarik Rymphang, ka DGP kala thung ia ka SIT ban pynlong ia ka jingtohkit halor ka jingbthei ka par dewiong ha Mynsngat-Thangsko, East Jaintia Hills. Ia kane ka SIT la khlieh da u Dy Inspector General of Police (ER) Vivekanand S Rathore.
Ia ka SIT la bthah ban pynshisha ia ki daw bad ki jingjia kiba lam sha kane ka jingbthei ka par, ban pynlong ia ka jingtohkit kaba bniah halor kane ka jingjia bad ban ithuh ia ki jingpynkhein ia ki hukum ka Iingkashari/NGT ba iadei bad ka jingtih par beain.
Ha kajuh ka por, ka Iingkashari kala shim ban buh jingthoh ia ka 37th Interim Report bala aiti da ka Justice BP Katakey Committee, kaba peit pyrman ia ka jingtih dewiong beain bad ki jingpynkhein ain hapoh ka Jylla.
Hynrei, haba pynpaw ia ka jingduna ka por ban bishar ia kane, ka Iingkashari kala bthah ban buh bishar biang ia kane ka kam ha ka 27 tarik Iaiong, 2026 ha ryngkat bad ka PIL No 2 jong u 2022.
 halor ka jingbthei ka par dewiong ha Mynsngat-Thangsko, East Jaintia Hills, kaba shim ia ka jingim ki palat 30 ngut ki nongbylla bad ong ba ia kane ka kaiphod yn wan pynrung ha ki jingthoh hashuwa ka sien shong bishar ban wan.){kind=link}