Shillong, Risaw 20 : U Nongialam ka UDP bad Myntri Sorkar ma Lahkmen Rymbui hynne ka sngi palei ula pynpaw ia ka jingsngewskhem ba ka UDP kan ioh bun ia ka jingjop ha ka elekshon MLA-2023.
“Ngi iakhun ia ka elekshon ban jop bun eh ki MLA ha Ri-Lum Khasi bad Jaintia bad ha baroh kawei ka Jylla. Ka UDP ka dang don ban neh. Ka UDP kan dei ka party ka ban ioh ia ka sur u paidbah bad ka UDP kan jop bun eh ki MLA ha ka elekshon ban wan” ong u ma Lahkmen haba iakren bad ki nongthoh khubor.
Haba pynpaw ba baroh ki seng sain pyrthei kin pyrshang ban jop bun eh ki MLA, u Myntri ula ong “Hynrei ngi hap ban ithuh ia ka bor jong ki wei pat ki party bad kumba nga ong, ka Politics ka dei ka kam kaba iaid beit bad ngi hap ban trei haduh ka sngi thep vote”.
Ula ong ba ka UDP kan wan phai biang ha kane ka kynti da ka jingdon bun eh ki MLA ha ka Iing ba 60 ngut ki dkhot.
