Shillong, Risaw 20 : I Nongialam ka Congress Legislature Party (CLP) ba shah sospon, Kong Ampareen Lyngdoh hynne ka sngi palei ila ong ba kan bha shibun ban mih noh da kaba suk na ka Congress katba ka dang biang ka por.
Ine I MLA ka East Shillong ila pynpaw ia ka jingbym itynnad ia ka rukom pynlong ka Congress ia ka elekshon President bad ki kynrum kynram kiba bud hadien.
Haba iakren bad ki nongthoh khubor, I Kong Ampareen ila ong ba lada u Nongialam Congress bala rim bha kum u Shashi Tharoor u iohi ba ka don ka jingiaid lait ia ki kyndon bala buh, ma I ruh in iaid lang bad u namar I tip bad ithuh bha ia u shimet.
U Tharoor ula shah rem ha ka elekshon pyrshah ia u Mallikarjun Karge, u President ba dang shu shah jied thymmai jong ka Congress.
I la ong ba ka long kaba sngewsih ban iohi biang ia ka jingmih ki kynrum kynram, ka rukom pynlong ia ka elekshon ka dei kaba pynkhuslai eh ia I haba bynrap “Nga khmih lynti ba kin pynlong ha ka rukom kaba dei bad ba pynhun ia baroh”.
Haba pynpaw ba baroh kila khmih lynti ba kan don ka jingpynkylla ia ka Congress naduh na khlieh, ine I MLA ka East Shillong i la ong “Hynrei haba phi peit ia kaei kaba iakren mynta ha ki lad pathai khubor phim tip kano kaba dei bad kano kaba lait hynrei ka pyni ba ngin (congress) dang hiar arsut shuh shuh”.
Haba pynpaw ia ka jingartatien ba kane ka jinglong jingman kan kyntiew ia ka Congress, I kong Ampareen ila ong ba ki briew kum ma I kiba dang don ha ka Congress kila nang iohi thikna ba lehse kala dei ka por ban mih noh namar kam I don lynti da kumwei pat.
“Kumba ngi ieid ia ka Congress, kumba ngi burom ia ka Congress bad ki nongrim jong ka hynrei haba kum kine ki kynrum kynram ki mih hakhmat, ngi kiba la don lypa shiliang ka kjat shabar, ngi kwah ban mih noh da kaba suk katba ka dang biang ka por. Sngewsih hynrei ka dei ka jingshisha” ila ong.
Ila bynrap “Haba nga peit sha Rajasthan bad nga iohi ia ka drama ba jia ha Rajasthan, ka pynkhuslai shibun. Kawei ka Jylla hadien kawei pat, ngi iohi ia ka jingnang hiar jong ka Congress” .
