Shillong, Risaw 20: U Myntri Kam Pohiing ka jylla ma Lahkmen Rymbui hynne ka sngi palei, u la ong ba lyngba ka jingtrei shitom jong ka sorkar bad ka Tnad Pulit, ka jingioh kurup ia u droks heroin hapoh ka Jylla naduh u snem 2018 haduh mynta kala la kot sha ka T.100 Klur tam.
“Nga lah iohi jingkynnoh u Bah Vincent Pala ba ka sorkar bad u Myntri Kam Pohiing kila ailad ia ka kam khaii drok bad kane ka long kaei kaei ka bym lah ban pdiang satia ia ka jingkren u President jong ka seng Congress” ong u Myntri.
“Hynrei ka jingshisha ka long naduh u snem 2010 haduh 2017 ka jingioh kurup ia u drok bad ka jingiohkem ia kiba donkti ka long kaba duna bha, hynrei haba peit iaka rekod jong kane ka sorkar kaba mynta naduh u snem 2018 haduh mynta, ka jingioh kurup ia u drok, ka jingkem bad ka jingpynngat kyndon ia ki nongdie ka jur bha” ula bynrap.
“Balei ka Congress kam shim la leh eiei bad ngi tip bha ia u Bah Pala ba udei u briew uba donkti lut ha baroh ki jait kam ha ka por ba ka Congress ka synshar iaka jylla. Dei na kane ka daw haba ula shimti kum u President jong ka Congress bad baroh ki MLA kila phet lut namar ki tip u dei u briew uba kumno” la ong u ma Rymbui.
U la iathuh, ba naduh u snem 2018 haduh mynta ki pulit kila ioh ban kurup 17360 gram u Heroin uba shongdor 105.78 Klur tyngka, u Ganja 9204.837 Kg uba shongdor 13.35 Klur tyngka, u Opium 2796 gram uba shongdor 3.35 Lak tyngka, ki Yaba Tablet 87.0021 Kg kiba shongdor 34.8 Klur tyngka, ki dawa jyrhoh ne Codeine Cough Syrup 6098 bitor kiba shongdor 30.49 Lak bad kiwei kiwei ki jingdih pynbuaid ne Psychotropic Substance kiba kot 8,99824 Kg.
U ma Rymbui u la pynpaw haba ianujor bad kiwei pat ki snem, la shem ba ka jingioh kurup ia ki jingdih pynbuaid ka long kaba duna bha.
Ula iathuh ba naduh u snem 2010 haduh 2017, ka jingioh kurup ia u drok Heroin ka long 2375.206 Gram uba shongdor 14.25 Klur tyngka, la kurup ia u Ganja 538.176 Kg uba shongdor kumba 8.07 Lak tyngka, ym shim la ioh kurup satia ia u Opium ne ki Yaba Tablets, katba la ioh kurup ia u Codeine Cough Syrup 35830 bilor kiba hsongdor 1.79 Klur tyngka bad kiwie kiwei ki jingdih pynbuaid ne Psychotropic Substance kiba kot 9.279972 Kg.
