Shillong, Jylliew 08 : U Myntri Rangbah ka Jylla Conrad K Sangma ha ka sngi Nyngkong, ula ong ba u MP ka Rajya Sabha na Meghalaya un shim ia ka bynta ba kongsan eh ha kaban pynsngew ia ki jingdonkam ba hakhmat ka Jylla sha ka Sorkar pdeng, haba pynpaw ia ka jingsngewskhem ba u kyrtong ka MDA James K Sangma un ioh ia u nombor ban jop ia ka elekshon.
Haba kren sha ki nongthoh khubor hadien ba dep thep kyrteng u James, u Myntri Rangbah ula ai khublei ia ki paralok ha ka MDA namar ka jingkyrshan tylli lang kawei.
“Nga kwah ban ai khublei ia u James Sangma halor ka jingthep kyrteng bad nga kwah ai khublei ruh ia baroh ki paralok ha ka MDA namar ka jingiarailang ban kyrshan ia ka jinglong kyrtong u James Sangma. Mynta ka sngi, bun na ki paralok kila iadonlang ha ka jingthep kyrteng” ula ong.
Halor ka jingkyrmen jong kiwei pat ki kyrtong, u Conrad ula ong ba kiei kiei baroh kin sa long shai hadien ba kut ka jingia thep kyrteng.
“Haba iadei bad kiwei pat ki kyrtong, ngim pat da thikna bha. Ngin hap ban ap katto katne kynta. Kumta, kaei kaba long, ngi sngewskhem bha bad lada don kiwei pat ki kyrtong, ka MDA ka don ia u paid ban pynthikna ba u kyrtong jong ngi un jop ia ka elekshon Rajya Sabha” ula ong.
U Myntri Rangbah ula kren ia ki thup kiba bun halor ki mat kiba la khmih lynti ba u MP un rah iakren ha Parliament, kiba dei ki mat jong ka Jylla sha ka jingthaw ain hapoh ka ri.
Ula ban jur ba ka bynta jong u MP kan long kum ka jingiasoh hapdeng ka Shillong bad ka New Delhi ban lah kyntur ia ki jingdonkam ka Jylla sha ki Ministry bapher bapher.
U Conrad ula ong ba ka Sorkar Jylla kan iai bteng ban buddien tyngeh ia ki jingdawa ba hakhmat eh jong ka bad u MP un rah iakren ia kine ki mat hapoh Parliament.
“Kane ka long kaba donkam bha ia ngi. Ta ka daw haba don kano kano ka lad, ngi kum ka Sorkar bad kum ka party ngin shimkhia bha ban kyntur ia kine ki jingdawa. Kum u MP ba mihkhmat ia ka MDA bad ka Meghalaay, u MP un shim ia ka bynta kaba kongsan ha kaban pynsngew ia baroh ki mat ba ngi la shimkhia, la ka dei ka Eight Schedule, Sixth Schedule, FCRA Amendment, ka jingrung beain ki mynder ri, ki kam kum ka ILP bad MRSSA. U MP un shim ia ka bynta ba kongsan ha ban rah iakren ia kine ki mat ha Parliament bad ha ka kyrdan ka Sorkar India” ula ong.
