“Bishar ia ka party thymmai na ka jingpynlong Seng, ym ka lyer social media: kynthoh u CM halor ka CJP

Shillong, Jylliew 08 : U Myntri Rangbah ka Jylla Conrad K Sangma ha ka sngi Nyngkong, ula kiar na ka jingkynthoh halor ka ‘Cockroach Janata Party (CJP), haba pynpaw ba ka dang kloi palat ban bishar ia ka seng sain pyrthei kaba dang hap ban seng ia ka jaka treikam jong ka.

Haba kylli halor ka jingsngew jong u, u Conrad ula ong ba ka jingkhlain jong kano kano ka party ka shong eh ha ka rukom pynwandur ia ka bad ka riti treikam jong ka, ym ka jingkhring paidbah ba shipor.

“Ngam don eiei ban kynthoh ia kano kano ka political party namar ka party ka donkam ia ka jingpynwandur kum ka seng, ka jaka treikam bad ki bynta jong ka riti treikam. Kumta, nga sngew ba ynda ka CJP kala ieng kum ka seng, hadien kata ngi la lah ban kynthoh” ula ong.

Une u Nongialam ka NPP ula kdew ia ka bynta jong ki rynsan digital ha kaban pynwandur ia ka jingsngewthuh, hynrei ula pynpaw ia ka jingiapher hapdeng ka jingiakhih (movement) bad ka political party kaba pura.

“Ia mynta, hooid, kala don ka lyer kaba lah ban jia ha ka pyrthei mynta. Ka social media ka dei kaba khlain bha, bad kumta ka lah ban pyniasnoh ia ki ishu bapher bapher bad ki nongrim bapher bapher. Ka kam ki riew shimet bad ki prokram ki lah ban long, hynrei ka political party ka long kham palat ia ka jingiakhih (movement). Ka jingiakhih ka dei ka jingsdang. Kumta, ka dang hap iaid jngai bha. Ngin hap ban ap bad peit kumno ki kam ki wan dur bad kumno ki kam ki kut” ong u Conrad.

Ula ban jur ba ka jingneh slem ha ka politics ka shong eh ha ka jingiaineh ban ia ka jingsawa haba sdang nyngkong.