Shillong, Risaw 14 : Ka Myntri ka Koit ka Khiah Kong Ampareen Lyngdoh ha ka sngi Nyngkong, kala pynpaw ia ka jingsngew skhem ba ka Shillong Medical College kan dep hapoh u 2025-26 bad pynpaw ba ki kam mynta kila iaid shaid shaid ha ka lynti kaba dei.
Haba iakren bad ki lad pathai khubor, ka kong Ampareen kala ong “Ngi don ha ka lynti ban ioh ia ka Medical College kaba ar ka ban pyniaid da ka Sorkar hapoh ka Jylla. Kyrmen skhem ba shen, ngin sa pyndep noh ia ki kam. Ngi la dep ong teng ba ngi la buhthong ban pyndep hapoh u 2025-26”.
Haba pynpaw ba ki don katto katne ki kam kiba kongsan kiba la dep ban shim, ka Myntri kala ong “Kawei na ki kam ba dang sahteng mynta ka dei ka Service Rules kaba dang bishar da ka Tnad Personnel bad hadien bala dep rai bad mynjur ia ka service rules bad kiwei kiwei ki jingdonkam, ngin sa lah ban sdang noh ban seng ia kane ka medical college”.
Ka Myntri ka pyntip ba ka Tnad kala dep phah ia ka aplikeshon ban pyniasoh ia ka Medical College bad ka North Eastern Hill University (NEHU).
“Ka NEHU kala dep iashong jingialang bad ka Tnad ka Koit ka Khiah hynrei ia kane yn sa iathuh bad sa ai ban bishar u paidbah ynda kila dep lut nadong hadong. Ngim dei ban iathuh eiei tad haduh ba ki bor khmih kila shim ia kine ki rai” kala ong.
Halor ka Tura Medical College, ka Myntri ka pyntip ba ka jingpyntrei ia ka jingtei kala iaid shaid shaid mynta.
Halor ka PA Sangma International Medical College jong ka University of Science and Technology, Meghalaya (USTM) kaba la ioh jingmynjur dang shen ban pdiang samla pule ba 150 ngut ha ka MBBS course da ka National Medical Council (NMC), ka kong Ampareen ka pyntip ba ka Tnad ka Koit ka khiah ka dang pynkhreh ban shna ia ka cabinet memo ban pynbeit ia ki kam ki jam baroh.
Kala kular ba ka Jylla Meghalaya kan ioh nong bha na ka jingioh ia ki seat pule ha kane ka medical college ba thymmai.
