Shillong , Risaw 18: Ka kong Sweet Beconia Lyngdoh kaba ioh rah iaka nam ‘Mrs Tourism 2022’ hynne ka sngi ba-ar, kala ai khublei ia ka Sorkar Jylla khamtam eh ia u Symbud Myntri Rangbah ka jylla bah Prestone Tynsong namar ka jingkyrshan ba kan poi sha ka thong .
Haba kren sha ki lad pathai khubor ka kong Sweet kala iathuh baka la shah khot sngewbha haka ophis Consul ka Embassy Thailand ban wan iashim bynta haka jingiakop Mrs Tourism 2022 ka ba la long ha Bangkok bad dei namar ka jingkyrshan naka sorkar, kala ai mynsiem iaka ban leit shim bynta ha kane ka jingiakop thei bhabriew.
“Hashuwa ba ngan leit sha Thailand, nga la kynduh ia u bah Prestone bad ula kyrshan ia nga bad ula ai mynsiem ia nga ba ngan trei shitom khnang ban wanrah ia ka nam bad ka burom iaka ri bad iaka jylla Meghalaya baroh kawei” la ong ka kong Sweet.
Ka kong Sweet kala iathuh ba ka don ka jingmut ban kyntiew sa ia kiwei ki kynthei ban shim bynta ha kum kine ki rynsan khamtam kito kiba don iaka sap.
Kala iathuh ruh ba lyngba ka Megastar kala iatreilang bad bun ki stad doctor naka bynta ban sumar bad ban ai jingiarap iaki briew kiba ioh pang bampong (Cancer) khamtam iaki kynthei kiba don jingpang ‘Breast Cancer’.
