SHILLONG, Risaw 18: U MLA ka Sohiong jong ka Hill State People’s Democratic Party (HSPDP) u bah Samlin Malngiang ula kam baka party haduh mynta kam pat phah ‘Show Cause Notice’.
U bah Samlin ula ong ba lada u ioh pdiang iaka ‘Show Cause Notice’ kum u MLA u don ka jingkitkhlieh ban jubab haba iadei bad ki khubor phet seng noh hynrei haduh mynta u khlam pat ioh jingthoh eiei naka party bad dei namar kane haduh mynta u khlem pat kren eiei.
Lah ban kdew ba dang shen u president ka HSPDP u bah K.P Pangniang ula kam ba ka party kala dep ban phah ‘Show Cause Notice’ sha baroh 2 ngut ki MLA bad dei tang u myntri ka tnat PHE u bah Renikton Lyngdoh Tongkhar uba la jubab ne phah ktien sha ka party.
“Lada nga ioh pdiang iaka ‘Show Cause Notice’ nga kloi ruh ban phah iaka jubab hynrei haduh mynta ngam pat ioh pdiang jingthoh kumba la kam da u president ka HSPDP” la ong u bah Samlin.
U bah Samlin ula ong ba haduh mynta um pat lah ban rai na kano ka party un iakhun iaka ilekshon 2023 namar haduh mynta ki paidbah bad ki nongkyrshan jong u kim pat shim iaka rai ba khatduh.
