Shillong, Nailur 24 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Balang, ula lum ia ka jingialang bishar kam halor ka jingiaid ki jingtrei jong ki project surok bapher bapher kynthup ka Greefield High-Speed Corridor.
Kiwei pat ki project ki kynthup ia ka Western Bypass, surok Shillong-Dawki bad ka Tura Bypass- kiba la pyntrei da ka jingthmu ban pynkhlain ia ki lad pyniasoh surok hapoh ka Jylla Meghalaya.
Haba kren sha ki lad pathai khubor hadien ka jingialang, u Bah Prestone ula pyntip ba ka Greenfield High-Speed Corridor project, kaba jrong haduh 166.80 km na Mawlyngkhung, Umiam sha Panchagram ha khappud ka Assam, kala iai bha shaid shaid.
Ka kam sorjamin ha Ri-Bhoi bad West Jaintia Hills kila jan dep bad ka jingpynkhreh ban pynmih ia ka jingpynbna ban shim jaka, kala nang iaid.
U Bah Prestone ula pynpaw ia ka jingsngewskhem ba ia ka sorjamin jong kane ka project yn sa pyndep hapoh ba kut jong u snem watla ki don ki jingeh ha East Jaintia Hills namar ka jinglong ka jaka bad ka suinbneng.
“Nga thikna ba haba kut jong une u snem, ngin sa lah ban pyndep wat ha East Jaintia Hills ruh. Ngi don shibun ki jingeh (ha ka district) namar ka jinglong ka jaka bad ki briew ki hap ban iaid kumba 2-4 kynta, kumta ka shim shibun ki por bad ruh namar ka aiom slap…ka NHIDCL ha ryngkat bad ki bor District kin sa sdang biang ia ka kam naduh ka taiew ba nyngkong u Risaw bad nga thikna ba kin sa lah ban pyndep ia ka sorjamin ba bniah jong kane ka surok haba kut une u snem” ula ong.
“Hadien ba dep kane, ngi la kut jingmut ban pynthikna ba ka jingpyntreikam ia kane ka project, kaba dei ka project jong ka Ri kan iaid beit. 166 kilometer kam dei kaba kai” ong u Bah Prestone haba ban jur ba ka Sorkar Pdeng kala mang bun bha ia ka pisa kaba kot palat T.22,864 klur na ka bynta ki Jylla ka thain Shatei Lam Mihngi.
U Symbud Myntri Rangbah ula pynbna ruh ba ka project Tura bypass kala jan dep artad.
“Ngi la poi ha u pud ban pynithuh ia ki trai jaka na ka bynta ban siew ia ka bai jaka. Baroh ki kam kila iaid ha ka lynti kaba dei bad nga thikna ba hapoh une u snem, ngin sa lah ban pyllait noh ia ka bai jaka na ka bynta ka Tura bypass” ula ong.
Haba pynpaw ba ka song I,II,IV bad V jong ka surok Shillong-Dawki kila iaid bha, u Bah Prestone ula bthah ia ka company ba pyntrei ia ka project ba kan pyndep noh ia ka project 4 lane hapoh u Nohprah mynta u sne. I aka song II, IV bad V la khmih lynti ban pyndep hapoh u Nohprah 2026.
“Ki heh ka Company kila kular ia ngi ba kin lah ban pyndep noh ia ka 4-lane project hapoh u Nohprah mynta u snem” ula ong haba bynrap “Nga thikna ba wat ka song II yn sa lah ban pyndep hapoh ka tarik kaba kila buh kata ha u Nohprah2026. Kumjuh ruh ka long ia ka song IV bad V bad nga thikna ba ngin dep kat kum ka por bala buh da ka NHIDCL bad ka kompani ba pyntrei ia ka project”.
Ula pyntip ba ka Pynursla bypass ka dang ap ia ka jingpynbna jong ka 3G ban rai khatduh ia ka jing siew bai jaka. “Shisien bala aiti ia ka jaka sha ka NHIDCL, ka jingpyntrei ia ka kam ka lah ban sdang noh” ula ong.
Halor ka jingiaid ki kam jong ka project Western bypass, u Bah Prestone ula iathuh ba ka jingiaid jong ki kam ka long kaba ihun bha, watla ki don katto katne ki jingeh ba iadei bad ki jingiakam ia ki jaka kaba donkam ban hap pynbeit.
U Bah Prestone ula bthah ia ki Deputy Commissioner ka Ri-Bhoi bad East Khasi Hills ba kin pynbeit noh kham kloi kat kaba lah ia kane ka kam.
“Nga thikna ba kane ka project kan sa dep noh hapoh u snem ban wan” ula pynpaw.
 Bah Prestone Tynsong ha ka sngi Balang, ula lum ia ka jingialang bishar kam halor ka jingiaid ki jingtrei jong ki project surok bapher bapher kynthup ka Greefield High-Speed Corridor.){kind=link}