Shillong, Nailur 24: Ka Malki kala pynrem da 1-0 ia ka Nongrim Hills ha ka jingiakhun ia ka Shillong Premier League 2025 kaba la long hynne ka sngi Balang ha SSA Stadium, First Ground, Polo.
U Ribanshan Marpna ula thep ia ka kol ha ka 68 minit kaba la pynthikna syndon ia ka Malki ban khur ia ka jingjop ha kane ka jingiakhun pyrshah ia ka Nongrim Hills.
Ka jingjop ka Malki kala pynlong syndon ia ka ban lait na ka jingshah pynhiar kurdan ne ban don ha ka Relegation Zone bad mynta kala kiew sha ka kyrdan kaba 6 ha kane ka lympung iakob ialehkai.
Kane kadei ka jingialehkai kaba khatduh jong ka Round 5. Kane ka jingiakhun kala dei ban long ha ka 12 tarik u Nailur hynrei la pynsangeh noh namar ka jingther u lapbah bad ka jinglang um ka madan ialehkai.
Kane kadei ruh ka jingialehkai kaba nyngkong jong ka SPL hadien ba kala don ka jingpynsangeh ia ka jingialehkai shipor bad mar ia sdang ka jingiakhun ha ka kylla step baroh artylli kine ki kynhun kim shym la lah ban thaw pyrthei eiei ban ioh thep kol.
Mar ia sdang ka kylla miet ka Malki kala sdang ban ialehkai bha ha kaba u Ribanshan Marpna ula thep ia ka kol ha ka 68 minit da kaba shut jam ha ryngkat bad ka pynkhun ia ka bol kaba la leit rung shapoh kol ia kaba u nongap kol ka Nongrim Hills u Ebenson Warbah ym shim la lah ban leh eiei.
Ka Nongrim Hills kala iakhun tyngeh ban ioh ban pyniakhiad hynrei kam shym la lah ban thaw ia kano kano ka kabu kaba biang ban ioh thep kol bad ha kaba kut hi kala mad biang ia ka jingrem kaba 4 sien lynter na ki 5 sien ki jingiakhun bad kala ioh khur ia ka 1 point da kaba iakhaid bad ka Laitkor da 2-2.
Ka jingjop ka Malki kala pynlong ruh ia ka Rangdajied United ban poi noh sha ka kyrdan kaba 9 bad ban don ha Relegation Zone. Ka Mylliem bad ka Rangdajied kila kamai mar 5 point hynrie ka Mylliem kala wan kham shakhmat na ka jingiapher ha ka jingioh ban thep kol.
Ha ka sngi Palei ka jingiakhun kan long hapdeng ka Laitkor pyrshah ia ka Rangdajied ha ka por 3:30 nohphai sngi.
