Shillong, Jylliew 19 : U Myntri Rangbah ka Jylla Conrad K Sangma, hynne ka sngi Balang, ula lum ia ka jingialang bishar kam lyngba ka video conferencing, halor ka jingshlei um hapoh ka Jylla na ka jingther u slap ha kine ki khyndiat sngi bala leit noh.
Kiba iadonlang ha ka jingialang ki kynthup ia u Myntri ka Tnad Revenue & Disaster Management Bah Kyrmen Shylla, u Chief Secretary Bah DP Wahlang bad ki Heh Ophisar ka State Disaster Management Authority,
U Myntri Rangbah ula shim jingkhein ia ki jinglong jingman ha baroh ki District bad ong ba ki lad jingiarap sha ki briew ba shah ktah ka dei ban wan hakhmat eh.
Ula kyntu ia ki Deputy Commissioner ba kin peitngor bha ia ka jinglong jingman khamtam eh ia ki jaka kiba lah ban shah ktah jur.
Ula kular ia ki District ban ai ia baroh ki jingkyrshan ba ki donkam bad bthah ba ia ki lad jingiarap bad ki song pisa sha ki longiing ba duh ia ki mynsiem briew, dei ban pynpoi noh hapoh ka 48 kynta.
Ki bor pyniaid District kila pyntip ia ka jingtwa khyndew, jingkhyllem ki dieng kiba la khang lynti ia ki surok bad ka jingdkut ki sainar elektrik ia kiba la dep ban pynkhuid bad maramot.
