Shillong, Jylliew 19 : Ka Sorkar Jylla kala thaw da ka Committee ka ban wanrah ia ka Ain ka ban treikam solansar ha baroh kawei ka Jylla na ka bynta ka jingai Scheduled Tribe certificate.
Kane ka Committee kan dei kaba khlieh da u Myntri ka Tnad Social Welfare Bah Paul Lyngdoh kum u Chairman ha ka jingiadon lang ki dkhot na ki lai tylli ki Autonomous District Council (ADC) ka Jylla, ka Tnad Ain bad ka District Council Affairs (DCA).
Ia kane ka Committee la thaw ha ka jingialang bala pyniaid da u Symbud Myntri Rangbah ka Jylla ba khmih ia ka Tnad District Council Affairs (DCA) Bah Prestone Tynsong hynne ka sngi Balang, ha ka jingiadonlang u Myntri ka Tnad Social Welfare bad ki MDC ka KHADC, JHADC bad GHADC.
Haba kren sha ki lad pathai khubor, u Myntri ka Tnad Social Welfare Bah Paul Lyngdoh ula ong ba kane ka kam kala mih hadien ka jingiatakhuh jong ka Office Memorandum (OM) ka Tnad Social Welfare bad ka KHAD (Lineage Act) ka KHADC 1997, ia kaba la dep ban weng hadien ula shimti kum u Myntri ka Tnad.
U pyntip ba kane ka jingialang hynne ka sngi, ka dei kaba lum ban wanrah ia ka rukom treikam kaba long solansar/ryntih ha ka jingai ST certificate, Tribe Certificate bad ka Clan certificate hapoh ka Jylla baroh kawei.
“Namar kane ka kam ka don jingiadei bad ka iohkam iohjam, ban pynithuh mano ba dei ki riewlum bad ter ter..kumta ka long kaba donkam ban kynthup lang ia baroh ki Scheduled Areas ka Jylla ban wanrah ia ka jingai ST ba long kumjuh ia baroh” ula bynrap.
Namar ba ka GHADC bad ka JHADC kim pat don satia iala ki jong ki Lineage Act, u Bah Paul u pyntip “Ka GHADC mynta ki dang thaw ia ka Bill katba ka JHADC kam pat don sdang satia ia ka kam”.
“Ka kam ai ST certificate, clan certificate ka dei ban long kumjuh ha baroh kawei ka Jylla..kaba sah mynta ka long ba ngin shim ia ki jingai jingmut da ka jingthoh na ki ADC lane ki draft Bill jong ki artylli ki District Council (GHADC/JHADC) bad hadien ngin sa shong pyrkhat biang” ong u Bah Paul.
“Mynta ngi la pan ia ki jingai jingmut na ki Autonomous District Council khnang ba ngin ioh pynmih da kawei ka Office Memorandum kaba treikam ha baroh kawei ka Jylla” ong u Bah Paul.
