Shillong, Jylliew 19 : Lada ki paidbah ka Jylla ki iohi ia ka jingpluh khlaw, wat sheptieng kulmar hynrei ban pyntip ia ka jingjia lyngba ka phone.
Ka Tnad Forest ka Jylla kala pyntreikam mynta ia ka Mobile Application- The Meghalaya Forest Fire Information System (MeFFIS), ba lah ban download na ka Google Play Store jong ka phone, khnang ba ki paidbah kin lah ban thep ia kino kino ki jingtip kiba iadei bad ki kam pluh khlaw ha Jylla.
Kane ka long kaba kongsan namar kumba 49% na ki khlaw ba don ha Jylla, ki dei kiba ap jingma na ka jingpluh. Kane ka jingkhein ka dei kaba heh ban ia ka jingkhein jong ka Forest Survey of India da 10%.
Kat kum ka jinglum jingkhein ia ki khlaw ba don jingma ha Meghalaya ka pyni ba ha Ri-Bhoi District ka dei kaba bun eh ka jaka ba lah ban kem ding kata haduh 50% (1068.72 sqkm) jong ki khlaw ba don ha ka District.
Napdeng ki Block, ka Rongjeng Block ha East Garo Hills ka kot sha ka 74.3% naka jingdon ki khlaw ba ap jingma, ka West Khasi Hills District ka dei kaba don bun eh ki khlaw bala pluh (palat ia ka 100km) ha baroh kine ki snem, ka Mawshynrut ha West Khasi Hills ka dei kaba Block ba shah ktah jur eh ha Jylla ha ka jingdon ki khlaw kiba pluh.
Ka jingpluh khlaw ka dei kawei na ki jingma ba khraw eh ia ka spah mariang bad ki jingthaw ba im, hapoh ka Jylla. Bun bah ki khlaw kila pluh manla u snem namar ka jingkem ding. Namar kata, la shna mynta ia ka Meghalaya Forest Fire Information System (MEFFIS) dashboard kum ka lynti ban ioh jingtip na ka bynta ki nongshim rai ba kin peitthuh bad khein jingkhein hapoh ka por kaba biang ia ka jingpluh ki khlaw bad kiwei kiwei.
U Myntri Rangbah ka Jylla Conrad K Sangma ula pynpaw ba haduh 36% ki jaka khlaw ka Jylla, ki dei kiba don jingma bha na ka jingpluh, kaba thew shai ia ka jingdonkam ia ki jingkhein jingdiah ki ban btin lynti ha ka jingtem ia ki jingpluh khlaw.
Ia kane ka application lah ban download na ka Google Play Store khnang ba mano mano ruh kin lah ban thep ia ki jingtip ba iadei bad ka jingpluh khlaw ha Jylla. Ia kane ka jingtip lah ban thep ha ka ktien phareng lane da ka ktien lajong kum ka Khasi, Jaintia bad Garo.
Ka App ka shah ruh ban shon dur ia ki jingpluh khlaw ba jia ha kano kano ka jaka ha Meghalaya.
