Imphal, Nailar 01 : Ka National Investigation Agency (NIA) ka la shimti ia ka jingtohkit pyrshah ia ki arngut ki nong pathai khubor na Manipur ki ba la shah kem halor ka jingshah kynnoh donkti bad ka kynhun seng lehnoh.
Kine ki arngut ki nong pathai khubor na Manipur ki la shah kem noh halor ka jingshah kynnoh donkti ha ka ba pynrung dkhot na ka bynta ka kynhun seng lehnoh UNLF ka ba la shah khein beain. Ia kine ki samla ki ba la ioh ban pynrung la kynnoh ba la phah da kine ki arngut ki nongpathai khubor shapoh Myanmar na ka bynta ban ioh jinghikai.
U Bijoy Kakchingtabam (54) bad u Leimapokpam Shanjitkumar Singh (41 snem rta) ki la shah kem noh ha ki bor pulit ka Manipur ha ka 24 tarik u bnai Jylliew ba la dep.
Katba u Kakchingtabam u dei u associate editor jong ka local daily bad u president barim jong ka All Manipur Working Journalist Union (AMWJU), u Singh u dei u reporter hapoh ka Manipuri journal bad ruh u dkhot jong ka standing committee ka AMWJU.
“Ha ka jingsdang ia ka jingtohkit la shem ba kine ki arngut ki la pyrshang ban pynrung dkhot thymmai na ka bynta ka kynhun UNLF hapoh Bishnupur district ka Manipur bad ban phah ia ki shapoh Myanmar na ka bynta ka jingai jinghikai, kata lyngba ka hukum jong u Shakhen, u ba la kam ba u dei u publicity director ka UNLF ka ba treikam napoh Myanmar,” ong ka lad pathai khubor ka ba la shim ia ka jingkren jong u heh ka NIA.
“Hadien ba la set ia ki hapoh ka jingpeit jong ki pulit, ka agency kala tohkit ia ki halor ki jingthmu jong ka UNLF bad ban pynthikna ruh la ki don ne em kiwei pat napoh Manipur ki ba ia don ha kane ka kam pynrung dkhot,” ong shuh shuh u heh ka NIA.
