Guwahati, Nailar 01: Ka Assam ka wan ha ka kyrdan ka ba lai hapoh ka ri India halor ka jingdon jong ki briew ki ba iap na ka jingshah siat ha ki pulit.
Hashwa ka Assam ki don tang artylli ki jylla ki ba wan hakhmat, kata ka Jammu bad Kashmir bad ka Chhattisgarh.
Katkum ka jingioh lum jingkhein da ka tnat kam pohiing jong ka ri, ka Assam ka la sakhi halor ki 18 tylli ki jingjia shah siat iap ha ki pulit hapdeng ka snem 2021-2022.
Ka Jammu bad Kashmir ka la wan ha ka kyrdan ka ba hakhmat eh da ka jingdon jong ki 45 tylli ki jingjia shah siat iap, bud sa ka Chhattisgarh da 30 ki ba iap na ka jingshah siat ha ki pulit.
Napdeng ki jylla ka thain shatei lammihngi (Northeast) jong ka ri, ka Assam ka la sakhi halor ka jingdon bun eh ki briew ki ba iap hapoh ka jingpeit jong ki pulit (custodial death) bad halor ka jingdon ki ba iap na ka jingshah siat ha ki pulit hapdeng u bnai Iaiong 2020 bad u Lber 2022.
Hapdeng u bnai Iaiong 2020 bad u Lber 2022, ki la don haduh 41 ngut ki ba iap hapoh ka jingpeit jong ki pulit, bad 22 ngut ki ba iap na ka jingshah siat ha ki pulit.
Lah ban kdew ba na ka liang ka iingbishar Gauhati high court ka la pan ia ka kaiphot ka ba bniah halor ki jingtohkit ki ba la pynlong halor kine ki jingiap ki ba la wan jia hapoh ka jingpeit jong ki pulit ka Assam.
Nalor kata ka Gauhati high court ka la pan ruh ia ka kaiphot ka ba bniah halor ki jingtohkit ki ba iadei bad ka jingshah siat iap ha ki bor pulit ki ba la jia ha Assam naduh u bnai Jymmang jong ka snem ba la dep.
Katei ka iingbishar ka la hukum ruh ia ka sorkar Assam ba kan phah ia ka kaiphot la ka la don ne em ka jingbud ryntih ia ki kyndon ba la pynmih da ka iingbishar Supreme Court na ka bynta ban pynlong ia ki jingtohkit hadien ki jingjia ki ba iadei bad ka jingshah siat iap ha ki pulit. Halor kane ka phang la ai por 60 sngi na ka bynta ban ai ia ka kaiphot.
