Shillong, Risaw 28 : Haba pynjur ia ka jingpyrshah ia ka Shillong Ropeway Project, ka Joint Action Committee ha ka sngi Balang kala iakynduh ia u Syiem ka Hima Mylliem bad dawa ban pynduh pyndam noh ia ka sanad bala ai sha ki Rangbah Shnong ba aiwai ia ka jaka na ka bynta ka project.
“Kine ki Rangbah Shnong kila shet kylla ia ki nongshongshnong ka Riat Laban Dorbar Pyllun. Ngi la dawa ia u Syiem ban pynduh pyndam noh ia ka sanad jong ki” ong ka President ka JAC Deborah Marbaniang.
Kala pynksan ba ki Rangbah Shnong kim don satia ia ka bor ban aiwai ia ka jaka jong ka Shillong Viewpoint.
“Ka Viewpoint kam dei ka jaka shimet. Ka dei ka jaka paidbah, ka jaka ka shnong ba long trai da ki nongshongshnong ka Riat Laban Dorbar Pyllun. Ka sanad na ka Hima Mylliem ka thung ia kine ki Rangbah Shnong kum ki nongkhmih nongsumar-nongiada ia ka jaka. Kam ai satia ia kano kano ka hok sha ki ba kin die, lilam lane aiwai” ong ka kong Deborah.
Kat kum ka jingong jong ka, ki nongialam ka Riat Laban Dorbar Pyllun kila kular ba kin sa pynduh noh ia ka jingaiwai.
“Ngi la iakynduh ia u President bad Secretary hashuwa kane. Kila kular shai ha ngi ba kin sa pynduh noh ia ka soskular aiwai bala iasoi bad ka Sorkar. Kin sa iashong jingialang mynta ka sngi bad kin sa ai sha ngi da ka jingthoh. Ngi dang ap ban ioh ia ka jingpynthikna da ka jingthoh” kala ong.
Haba iai ban ia ka nongrim jong ka JAC, kala ong “Ngi la kyntu jur ia ki Rangbah Shnong ban pynduh noh ia ka soskular bad ban pyndam ia ka project. Ka Sorkar ruh ka dei ban pynduh pyndam noh ia ka. Lada ym pynduh pyndam ia kane ka project, ka JAC kan ym shu shu kli kti”.
