Shillong, Risaw 28 : Ka Congress ka dang ialeh ban pynkhlain biang ialade ha ka thain Shatei Lam Mihngi bad ban khyllie pat ia kaei kaba la duh, ong u nongialam ka Liang Pyrshah ha Lok Sabha Adhir Ranjan Chowdhury ha ka sngi Balang.
U Chowdhury, uba la pynlong ia ka jingialang bad ki nongialam ka party ha Shillong, ula ong ba ka party kala shah ktah namar ka jingphet seng ki nongialam bad ka sain pyrthei ba pyniapher jaidbynriew.
“Ka thain Shatei Lam Mihngi ka dei ka thain kaba ngi hap ban trei shitom ban pynioh pat ia ka jaka bala duh noh. Ha Meghalaya ruh, kumba long kiwei ki jylla, ngi la mad ia ka jingshah thied ki nongialam da ki party ba don ha ka liang synsahr” ula ong.
Haba ther iaka BJP, ula ong “Ngi la mad ia ka jingeh namar ka jingleh politics kaba wanrah ia ka jingsngew iapher jaidbynriew da ka party ba synshar. Kiba bun ki Regional party ha NE kila kylla long ki paralok ba iatreilang jong ka Sorkar bad kila pyndonkam lut iaka jingdon jingem ban pyntroin ia ka Sorkar ba kan bteng ban don ha ka bor”.
Wat hapdeng kane, u Chowdhury ula ong ba ki nongialam bad nongkitkam ka party ki dang iai long kiba trei shitom.
“Phi la iohi mynta ia ka mynsiem treikam jong ki nongtrei ka party ha ka Ophis ka party. Ngi la iakren ia ki buit treikam jong ngi. Kumba long ha kiwei ki bynta jong ka Ri, ka Congress hangne ruh ka dang ialeh ban pynkhlain biang ialade” ula ong.
Ula pynpaw ba ka thain Shatei Lam Mihngi kan sa wanphai biang sha ka sem jong ka congress.
