Shillong, Kyllayngkot 05: Ka Mawlai SC bad ka Rangdajied United FC kila sdang ia u snem thymmai da kaba khur ia ka jingjop ha ka OC Blue Shillong Premier League 2024-25 kaba la long ha ka sngi Saitjain ha SSA Stadium, First Ground, Polo.
Ka Mawlai kala pynrem da ka said ia ka Laitkor SC da 1-0, kaba la thep ia ka kol da u Baiaikara Swer ha ka minit kaba 82, katba ka Rangdajied kala jop da kaba suk da kaba pynrem da 4-0 ia ka Nongthymmai SC.
U Owanijuh Pajuh ula thep ia ka kol mar ia sdang ia kaj ingkhun ha ka 1minit, u Benny Khriam ula thep kol ha ka 41 minit badu RT Hanson Pdang ula thep ia ka kol ha ka 88 bad 90’+4 minit.
Ka Laitkor kala pyrkhing bha ia ka rulom ialehkai ki nongialehkai jongka Mawlai ha kaba kim shym la ioh ia ka lad ban shut najan ia ka bol ban leit shapoh kol bad kane ka jingiakhun kala long kaba itynnad ha ryngkat ka jingdap smam da ki paid nongkyrshan.
Ha ka kylla miet u Moonstar Nongsiej jong ka Laitkor ula ioh ia ka kabu kaba biang hynrei haba ula shut ia ka bol kam shym la poi pat shapoh kol hynrei kala leit noh sharud.
Ka Laitkor hashwa ban kut ka jingiakhun, kala ialehkai noh sa tang 10 ngut rang ialehka namar ka jingshah beh noh jong uwei u nongialehkai u Euvasius Mawthoh (Red Card).
Ka jingjop ka Mawlai kala pynlong ia ka ban bat biang ia ka kyrdan kaba ha khlieh duh da kaba ioh khur 16 point bad kala bteng ban iai khur ia ka jingjop.
Ka Rangdajied kaba la mad arsien ia ka jingrem ha ka OC Blue SPL 2024, hynrei kala sdang ia ka jingiakhun ka jong ka da ka jingjop bad kala don ha ka kyrdan kaba 4 da kaba ioh khur 12 point.
Ha ka sngi Nyngkong ka jingiakhun kan long hapdeng ka Shillong Lajong FC pyrshah ia ka Nongrim Hills SC ha ka por 2 baje mynsngi ha ka sngi Nyngkong.
