Jowai, Kyllalyngkot 05: Da kaba buh hakhmat ban kyntiew ia ka jingialehkai Cricket ha kylleng ka jylla, ka Meghalaya Cricket Association, kala shim ia ka sienjam ban shna ia ka madan ialehkai Cricket ha Mukhla, West Jaintia Hills District bad ia kane ka jingthmu la pynthikna ha ka sngi saitjain da ka jingasoi ia ka jingiatehkular hapdeng ka Mukhla Dorbar Pyllun, West Jaintia Hills District Cricket Association bad ka Meghalaya Cricket Association.
Katkum kane ka jingiatehkular ban shim ia ka jaka kaba 5.93 akar ban pynbha ia ka jaka ban kylla long kum ka jaka ialehkai kaba paka katkum ka jingpynbiang ia ki jingdonkam baroh.
Ia katei ka jaka la shem lyngba ka jingshimkhia jongka WJHDCA ryngkat ka jingkyrshan jongu MLA ka thain u Bah Wailad Shylla uba ialade udei uba sngewtynnad ban ialehkai cricket ha ryngkat ka jingiatreilang bad ka Mukhla Dorbar Pyllun.
Ia kane ka jingiateh kular la pyniaid da u Bah Eddystone Shylla u President ka WJHDCA ha kaba la iadonlang u Bah Wailad Shylla, u Naba Bhattacharjee President ka MCA, Bah Rayonald Kharkamni u Vice President ka MCA, Bah Weibor Sohlang uba long u Secretary bad ki nongkitkam jongka WJHDCA, u Bah Hamran Shylla u President bad u Bah Hachwa Suna u General Secretary ka Mukhla Dorbar Pyllun kiba dei ki nongiasoi ia ka jingiateh kular.
U President ka MCA haba kren ha ka jingialang ula pynpaw ia ka jingsngewnguh ia ka Mukhla Dorbar Pyllun kaba kylluid mynsiem ha kaban mynjur ban aiti ia ka jaka harud surok kaban pynsuk ia ka leit ka wan.
Hashwa ban iasoi ia ka jingiateh kular, ka kynhun kala leit ban pynlong ia ka jingjurip ia katei ka jaka bad pynpaw ia ka jingsngewhun ia ka jingdon ia katei ka jaka ha ka jaka kaba biang bha ban ialehkai cricket.
Hajan jong kane ka jaka, la tei ruh ia ka jaka ialehkai football bad kumta ka MCA ka iengskhem ha kaban ai jingkyrshan ban pynkhlain bad ban kyntiew ia ka jingialehkai cricket ha ki shnong ki thaw kiba lah ban neh slem.
