Shillong, K’lyngkot 06 : Arngut ki briew kila iap bad bun ngut kila mynsaw haba ka Bolero pickup ba kit ia ki nongrwai Choir jong ka Iingmane Kynrut Presbyterian, kala kylla bad hap shapoh ka riat ha ka shnong Kynrut, West Khasi Hills District ha ka sngi U Blei.
La pyntip ba kane ka kynhun ki nongrwai Choir kila mih nala shnong ban leit sha ka Jingiaseng ha Mawdem District jong ka Iingmane Nongrilong Presbyterian, kaba hap hapoh ka Mawthadraishan constituency.
U Sordar ka Kynrut Bah Clement Nongsiej ula pyntip ba ki nongshongshnong kila ioh ia kane ka khubor ha ka por 11 baje mynstep. Kane ka kali kaba kit kumba 15 ngut eiei ki briew, kala iaid lyngba ka shnong Kyllem bad kala hap noh shapoh ka riat kaba jrong kumba 100 meter eiei na ka daw ka jingbym treikam ka brake.
Ki nongshongshnong haba ioh jingtip ia kane, kila leit mareh wut wut ban iarap bad pynkit ia kiba mynsaw sha ki jaka sumar ba marjan kynthup ia ka Kynrud PHC, Mairang Civil Hospital bad Shillong.
Ha kane ka jingjia, arngut ki briew kila iap ba kynthup ia u nongniah ka kali bad iwei I dkhot ka kynhun choir.
