Shillong, Jan 28: Ka Laitkor SC kala pynrem ia ka Sawmer SC da 2-1 hynne ka sngi ha ka jingiakhun ha ka OC Blue Shillong Premier League 2024 kaba la long ha SSA Stadium, First Ground, Polo.
U Samborwell Mynsong jong ka Laitkor ula thep ia ka kol ha ka minit kaba 5 bad 18 bad ha ka 32 minit Shanmeiaki Warlarpih ula thep ia ka kol na ka bynta ka Sawmer bad hadien kane kam shym la don shuh kano kano ka jingthep kol hapdeng kine ki kynhun ialehkai.
Ha ka jingiakhun ha ka wat kaba nyngkong, ka Laitkor kala pynrem ia ka Sawmer da 2-0 ha ka 28 tarik u Risaw 2024.
Kane kadei ka sien ka baar ia ka Laitkor ban jop arsien lynter ha ka jingiakhun ha ka wat ka baar bad dang ha kine ki khyndiat sngi kala pynrem da 4-0 ia ka Nongthymmai SC.
Mynta ka Laitkor kala don ha ka kyrdan kaba saw da kaba ioh khur 16 point kaba kynthup ia ka jingjop 5 sien, kawei ka jing iakhaid bad ka jingshah rem 5 sien.
Ha kawei pat ka liang, ka Sawmer kala mad ia ka jingrem kaba 5 sien lynter bad kala don ha ka kyrdan kaba 7 da kaba ioh 11 point kaba kynthup ia ka jingjop 3 sien, iakhaid 3 sien bad rem 6 sien.
Lashai ka sngi Balang ka jingiakhun kan long hapdeng ka Nongthymmai pyrshah ia ka Langsning FC ha ka por 2:30 mynsngi.
