Shillong, Risaw 29: Ka Nangkiew Irat SC kaba ialehkai tang 10 ngut ki rangialehkai, kala ioh mad ia ka jingjop ha ka OC Blue Shillong Premier League (SPL) 2024 hynne ka sngi Baar da kaba pynrem ia ka Langsning FC da 3-1 ha SSA Stadium, First Ground, Polo.
Kane ka jingjop kala pynkut shi syndon ia ka jingrem 8 sien lynter jong ka Nangkiew Irat ha ka SPL 2023, ha kaba ka Nangkiew Irat kala rem 6 sien lynter ha ka samoi ialehkai kaba la dep bad mynta ka kynti kala rem 2 sien.
Mar ia sdang ka jingiakhun u Dauruhipaia Pale ula thep ia ka kol naka bynta ka Langsning haka minit kaba 17, hynrei ka Nangkiew Irat kala jop ia ka jingiakhun lyngba ki 3 tylli ki jingshut ia ka penalty da u Wallamsuk Nongkhlaw ha ka minit kaba 66 bad 78, katba u Isak Vanlalpeka ula thep ha ka 43 minit.
Ki rangialehkai shadien jongka Langsning kim shym la lah ban ialehkai bha ha kaba ka Nangkiew Irat kala ioh bun tylli ki kabu tangba kam shym la lah pat ban thep kol ia kitei ki kabu kiba kala ioh bunsien.
Ka Langsning ruh kala ioh ia ka penalty hynrei u Dauruhipaia ula shrud ia katei ka bol sharud bad wat ka Nangkiew Irat ruh kala ioh iaka penalty kaba nyngkong hynrei u Isak ula shut sharud ia katei ka bol
Sa tang 20 minit shwa ban kut ka jingialehkai, ka Nangkiew Irat kala ialehkai sa tang 10 ngut ha madan hadien ba u Wanpynshngain Nongsteng ula ioh ar tylli ki ‘Yellow Card’ bad hadien kane ka Langsning kala ioh ia katto katne tylli ki kabu tangba kam shym la lah ban thep kol.
Ha ka sngi Balang ka jingiakhun haka SPL kan long hapdeng jongka Ryntih FC pyrshah ia ka Rangdajied United FC ha ka por 5:30 janmiet.
