Shillong, Rymphang 22: Ka Mawlai SC kala bteng biang ban khur ia ka jingjop ha ka OC Blue Shillong Premier League 2024 da kaba pynrem ia ka Sawmer SC da 1-0 kaba la long hynne ka sngi Saitjain ha SSA Stadium, First Ground, Polo.
Katba ha ka jingialehkai kaba la long hapdeng ka Laitkor SC pyrshah ia ka Ryntih SC, ka Laitkor SC kala pynrem ia ka Ryntih FC da 8-1 ha kaba u Samborwell Mynsong ula ioh ia ka hat-trick ha ka jingthep kol.
U Donlad Diengdoh ula the pia ka shi kol na ka bynta ka Mawlai ha ka minit kaba 36 pyrshah ia ka Sawmer bad hadien kane ka Mawlai kala ioh biang ia ki kabu ban thep kol hynrei kam shim la lah satia ban thep kol.
Ka jingiakhun hapdeng kine ki kynhun kala sdang ban itynnad bha ha ka kylla miet bad hapdeng ki jingpyrshang kiba bun ki liang ki mshym la lah pat ban thaw pyrthei eiei ban ia ioh thep kol.
Ha ka jingiakhun ha ka por mynstep ka Laitkor SC kala pynjem khnap ia ka Ryntih SC, ha kaba u Samborwell ula ioh ia ka hat trick da kaba the pia ka kol ha ka minit kaba 20’, 47 bad 59 bad ual long u nongialehkai uba khyndai bad uba nyngkongeh ia ka Laitkor ban ioh thep ia ka Hat Trick ha kane ka samoi ialehkai.
Ka Laitkor kala bteng ban thep ia ki kol lyngba u Moonstar Nongsiej ha ka 19 bad 53 minit, u Wadskhem Marbaniang ha ka 48 minit bad u Sandy Kharkongor ula thep ia ka kol ha ka 57 bad 63 minit, katba u Mangkara Sun ula ioh the pia ka shi kol na ka bynta ka Ryntih ha ka 39 minit.
Ka Mawlai mynta kala ioh 38 point na ki 14 sien ki jingiakhun bad kala tam da 5 point ia ka Shillong Lajong FC kaba don ha ka kyrdan ka baar.
Katba ka Laitkor SC kaba la ioh 23 point kala ioh ban shim noh ia ka kyrdan kaba 4 na ka Langsning FC kaba la ioh 21 point.
Katba ka Sawmer kala don hi ha ka kyrdan kaba 7 bad ka Ryntih ha ka kyrdan kaba 10.
Kin don artylli ki jingialehkai ha ka sngi Nyngkong, ha ka por 11 baje mynstep ka jingiakhun kan long hapdeng ka Shillong Lajong FC pyrshah ia ka Nangkiew Irat SC bad ha ka por 3 baje mynsngi ka jingiakhun kan long hapdeng ka Mawlai SC pyrshah ia ka Rangdajied United FC.
