Shillong, Nailar 3 :Ka jingiakhun ba nyngkong jong ka kylla kaba ar (second leg) ka Shillong Premier League hapdeng ka Rangdajied United bad ka Shillong Lajong FC hynne ka janmiet ha Madan Polo ka la kut ha ka jingiakhaid ba khlem kol.
Kane ka jingiakhun ka long kaba shongshit bha naduh kaba sdang haduh kaba kut jong ka jingialehkai.
Ha ka jingiakhun jong ka kylla kaba nyngkong (first leg), ka Rangdajied United ka la pynliem da 2-0 kol ia ka Shillong Lajong kaba long ha ka 18tarik Naitung.
Shwa jong kane ka jingiakhun, ka Rangdajied United ka don ha ka kyrdan kaba lai da ki 11 point katba ka Lajong pat ka don ha ka kyrdan kaba hynriew da ki 7 point. Ka jingiakhun hynne ka sngi kam don jingktah ei ei ia namar ki neh beit ha kajuh ka kyrdan shu iapher khyndiat tang ki point.
Watla baroh arliang ki la ialehkai bha hynrei ka jingbym lah ban pynkhih jar ka la pynlong ia ka Rangdajied bad kumjuh ia ka Shillong Lajong ban leit phai iing da kaba ia sam mar shi point.
Ka jingiakhun mynta ka sngi Palei pat kan long hapdeng ka Mawlai Sports Club kaba bat ia kyrdan ba hakhlieh duh jong ka miej ia khein point pyrshah ia ka Nangkiew Irat kaba don ha ka kyrdan ba san da ki 9point ha ka por 4:00 baje janmiet.
