Shillong, Jymmang 08: Ka Mawlai SC kaba dei ka Lahduh ha ka Shillong Premier League jong u snem bala dep, mynta ka kytu kala ioh rung biang ha ka Final jong ka SPL 2023 da kaba pynrem ia ka Langsning FC da 2-1 ha ka jingiakhun kaba la long hynne ka sngi Balang ha SSA Stadium, First Ground, Polo.
Kane ka jingjop kala pynlong ia ka Mawlai ban iakhun pyrshah ia ka Rangdajied United FC ha ka Final kaban long ha ka sngi Saitjaiñ. Ka Rangdajied kala pynrem ia ka Shillong Lajong FC da 1-0 ha ka jingiakhun ha ka Semifinal kaba la long hynin ka sngi Baar.
Ka jingiakhun hapdeng ka Mawlai bad ka Langsning kala long kaba itynad ha kaba baroh artylli ki ialehkai bha kaba la pynsngewtynnad bha ia ki paid nongpeitkai naduh ba sdang jong ka kylla step hynrei kine ki nongialehkai kim shym la lah pat ban ioh thep kol ha ka kylla step na ka jingialehkai bha ki nongapkol bad baroh ki rangialehkai.
Ka jingiakhun kala nang itynnad shuh shuh ha ka kylla miet ha kaba la thep ia baroh 3 tylli ki kol, u Robert Khongriah jong ka Mawlai ula thep ia ka kol ha ka minit kaba 50, hynrei tang hadien 7 minit kata haka minit kaba 57 u Chanmitre Thma ula thep ia ka kol kaba la pyniakhaidia ka Langsning bad ka Mawlai.
Hynrei ha ka minit kaba 68 u Kevin Rymbai ula thep ia ka kol ia ka Mawlai bad kane ka kol kala long syndon ka kol kaba la pynjop ia ka Mawlai bad pynioh rung syndon sha ka Final jong ka SPL.
Mynta baroh ki phaikhmat ha ka jingiakhun ka ban long ha ka sngi Saitjain hapdeng ka Mawlai SC kaba long ka Lahduh ha u snem ba la dep pyrshah ia ka Rangdajied kaba la wan ba-ar ha u snem ba la dep.
Kane ka jingiakhun ia ka Final kan sdang ha ka por 3 baje mynsngi
