Shillong, Mar 5: Ka Shillong Lajong FC kala don hapdeng ka jingiakhun ban ia knieh ia ka nam lahduh jong ka OC Blue Shillong Premier League 2024 hadien ba kala lah ban pynrem ia ka Rangdajied United da 2-1 hynne ka sngi Balang kaba la long ha SSA Stadium, First Ground, Polo.
U Samchaphrang Lato ula thep ia ka kol ha ka 27 minit bad u Iohborlang L Lyngkhoi ula thep ia ka kol lyngba ka Penalty haka minit kaba 45 na ka bynta ka Shillong Lajong, katba u Benny Khriam ula thep iaka kol ha ka 85 minit na ka bynta ka Rangdajied.
Ka jingiakhun hynne ka sngi ka long kaba kongsan bha iaka Shillong Lajong namar lada ka iakhiad ne ka rem, ka mut ba ia ka nam lahduh jong ka SPL la aiti ia ka Mawlai ban rah da kaba suk ia ka nam lahduh. Hynrei da ka jingjop, ka Lajong mynta kala duna da 2 point (42) ia ka Mawlai kaba la kamai 44 point, katba ka Rangdajied kaba don ha ka kyrdan kaba lai kala ioh 32 point.
Ka Lajong kala ioh thep ia ka kol kaba nyngkong lyngba ka jingshut u Rimankhraw Kharumnuid ha kaba u Deibormame Tongper ula ioh ban pyndei da ka khlieh ia ka bol hynrei katei ka bol kala leit dei ia ka khlieh jong u nongialehkai shadien jong ka Rangdajied bad kala leit sied ha ka jaka kaba biang bha kaba u
Samchaphrang ula ioh ban thep shapoh kol.
Hashwa ban kut noh ka kylla step ka Ljong kala ioh thep ia ka kol ha ka 45 minit, ha kaba u Aibiangmame Nongneng khlem da peit bha ula pynai pynban ia ka bol ha u Deibor bad haba ula leit rah ban thep kol, u nongap kol ka Rangdajied u Kerichard L Marshillong ula ioh pyndei ia u briew bad kumta u rephri ula ia da ka penalty. U Iohborlang uba la leit shut ia katei ka penalty ym shim la pynleh noh ei bad ula thep ia ka bol shapoh kol.
Ka Rangdajied kala ioh ia ki kabu ha ka kylla miet, ha kaba u Owanijuh Pajuh ula pyndei da ka khleih iaka bol hynrei u nongap kol ka Lajong u Siwel Rymbai ula ioh ban kem noh ia katei ka bol ban ym ioh rung shapoh kol. Ka RUFC kala ioh shut 3 tylli ki ‘Corner’ ha kaba ar tylli la ioh ban iada noh katba kawei pat kaba la ioh da u Aenam Jyrwa kala leit noh sharud.
U Benny Khriam uba la mih hadien ula ioh thep ia ka kol na ka bynta ka RUFC hynrei ka RUFC kama shym la lah pat ban thep kol biang ban pynpoi sha ka jingiakhaid.
Ha ka sngi Palei, ka jingiakhun kan long hapdeng ka Ryntih FC pyrshah ia ka Nongrim Hills SC ha ka por 3 baje mynsngi bad kane kan dei ka jingiakhun kaba khatduh ia kine ki kynhun.
Lada jop ne ia khaid ka Nongrim Hills kaba don ha ka kyrdan kaba 8 kan kiew noh sha ka kyrdan kaba 7, ka Nongrim Hills ha ka jingkhun teng pyrshah ia ka Ryntih ha u Nohprah 2024 kala pynrem da 6-0.
