Nongstoiñ, Ïaiong 20: Ka ïingbishar Special Judge (POCSO), West Khasi Hills District, Nongstoiñ, ha ka 18 tarik mynta u bnai, ka la rai pynrem ïa u Blansius Nongsiej da kaba hukum ban set phatok shi jingim ryngkat ka kuna kaba 50 hajar tyngka namar ka jingleh beijot bad pyniap ia kawei ka khynnah rit.
Kat kum ka hukum, ia une u runar la pynngat hapoh ka kyndon 302 IPC bad 30 snem ha along ryngkat kuna ba 20 hajar tyngka katkum ka kyndon 6 POCSO Act. Lada um lah ban siew ïa ka kuna un hap shong ruh sa 6 bnai ha along.
Kine ki kyndon baroh kiba u la ngat ki dei namar ka jingdonkti jong u ban batbor bad pynïap ïa kawei ka khynnah rit ha ka 31 tarik u Lber jong u snem 2019 ha kawei ka shnong ha West Khasi Hills.
Lah ban pynpaw hangne ba ïa kane ka jingjia, la shimti da ka Nongstoiñ PS kaba la register ïa ka case hapoh ka kyndon 302 IPC r/w Section 5(i)(l)(m)/6 of POCSO Act.
Hadien ba la tohkit bniah da ki pulit, une u runar Blansius Nongsiej u la shah kem mar mar hadien ka jingjia bad hadien ka jingïai tohkit, na ka liang ka ïing bishar lane Court of the Special Judge (POCSO), Nongstoiñ, ha ka 18 tarik mynta bnai ka la rai pynrem ïa une u briew.
