Shillong, Risaw 02: Ki nongtrei ka BSNL ha ka sngi Palei kila pynlong ia ka jingshah thngan bad ka jingiakhih kaba jai jai ha ki kynta por bam ja sngi ne ka Lunch-Hour Demonstration ha BSNL CTO, ban dawa ba dei ban mynjur noh mardor ia ka Third Pay/Wage Revision naduh ka 1 tarik u Kyllalyngkot, 2017.
Kane ka jingiakhih kaba la pynlong hapoh jongka lama jongka All Unions and Associations of BSNL (AUAB) ha ka BSNL Foundation Day ne ka sngi seng ia ka BSNL, kadei shi bynta jong ka jingiakhih kaba la pynlong ha ka Ri baroh kawei namar ka jingslem ha kaban pyntreikam ia ka jingtyrwa ban kyntiew ia ka tulop na ka bynta ki nongtrei kiba hap ha ka kyrdan Executive bad Non-Executive.
U Assistant Secretary ka Sanchar Nigam Executives Association, u Samir Khare ula ong, ba ki nongtrei ka BSNL kila iai ap ban pynbeit thymmai ia ka tulop naduh u snem 2007, katba ia kito kiba la thungkam hadien u snem 2007 kim shim la ioh jingmyntoi eiei na kano kano ka jingpynbeit thymmai ia ka jingsiew.
Ula ong, ba ka jingtyrwa ban pynbeit thymmai ia ka jingsiew na ka bynta ki nongtrei ha ka kyrdan Executive kadei kaba la tyrwa ha u snem 2018-19, katba ka jingtyrwa ban pynbeit thymmai ia ka jingsiew na ka bynta ki Non-Executive kadei kaba la aiti sha ka Department of Telecommunications (DoT) ha u bnai Rymphang 2026 bad kala iai neh khlem ka jingioh ia kano kano ka jingmynjur.
U Khare ula ong, ba ki nongtrei ka BSNL kila bteng ban kyrshan ia ki sienjam kiba kongsan jong ka sorkar, kynthup ban pyniaid shakhmat ia ka jingai jingshakri ia ka 4G bad BharatNet bad kila pynneh ia ka jingai jingshakri jongka Telecom wat ha ki por ba don ki jingjia jong ka jingwan lynshop ki bor mariang.
Ka AUAB kala pynbna ba kan bteng ban pynlong shuh shuh ia ki prokram, kynthup ban leit iakynduh ia ki MP bad ki myntri sorkar bad kala pynbna ruh ban pynlong ia ka jingiakhih ha ka Ri baroh kawei, ha ka 20 tarik u Naiwieng lada jia ba ia kitei ki jingdawa ym pyntreikam satia.
Ki nongtrei kila dawa ruh, ba dei ban weng noh ia ka ‘Affordability Clause’ ha ka jingpynbeit thymmai ia ka jingsiew ne Pay Revision.
