Nongpoh, Naitung 9 : Ka khyrdop jong ka Khasi Students Union (KSU) kaba la pynieng ban pyntreikam ia ka Inner Line Permit (ILP) ha 20 mer Pahammawlein, kala shah pynpra bad shah thang dusmon ha ki briew bym lah ban tip hynne ka step phyrngap.
Ka KSU kala pynieng ia kane ka khyrdop dang ha ka 6 tarik Naitung, ban talasi ia ki kot ki sla jong ki bar jylla kiba wan ban rung shapoh ka Jylla.
Ha kane ka sngi ba pynieng khyrdop, ka KSU tang hapoh ki katto katne kynta, kala ioh ban bat ia bun ngut ki bar jylla kiba thmu wan rung sha Jylla khlem ki kot ki sla bad ia kine ki bar jylla, la pynphai pat ia ki sha Assam.
Ka KSU kala pynieng ia kane ka khyrdop kum ka jingtynjuh ia ka Sorkar halor ka jingpynslem ban pyntreikam noh ia ka Inner Line Permit (ILP) ha Jylla bad ruh ia ka Meghalaya Residents safety and Security Act ne MRSSA.
Ki Nongialam ka KSU kila suba jur ba ka jingpynpra bad jingwiang ding ia kane ka khyrdop ka lah ban dei ka kam jong ki Pulit.
