Shillong, Nailar 21 : Kawei ka kali Bolero jong ka Sorkar ba don u nombor ML01-6416, kala shah wiang ding ha ki runar bym lah ban ithuh hynne ka step phyrngap por 1:40 eiei ha West Jaintia Hills.
Kane ka jingjia kala jia ha ka shnong Mookynphad Mihmyntdu bad la pyntip ba kane ka kali ka dei jong u Ophisar ka Tnad Transport.
Ki nongshongshnong kila pyntip ia kane ka jingshah wiangding sha ka Tnad Fire & Emergency Service, kaba la phah ia ki kali pynlip ding ban tehlakam ia ka ding.
Kat kum ka khubor, la iathuh ba kane ka kali kala julor bha na ki bynta ba shakhmat.
Kumjuh ruh ha Shillong, kawei ka thuk thuk kaba pynieng harud ka surok ha Malki, kala shah wiang ding ha ki runar ha ka step sngi Thohdieng.
Ki Pulit ki pyntip ba kila register case halor kine ki jingjia bad ka jingtohkit mynta kala iaid shakhmat ban lapdien ia ki runar kiba donkti.
Kine ki jingjia kila wan jia tang da ki kynta hadien ka jingshah kawang petrol bomb ka Nongmensong Police Outpost ha ka miet sngi Palei, kaba la pynjulor ia ka shuki bad ka kynroh jong ka outpost.
