Shillong, Nailar 21 : Palat spah tylli ki kali na Assam, kiba bun ki dei kiba kit ia ki nongjngohkai, la pyntip ba kila sahkut ha ki thain Sohra namar ka jingsniew ka suk ka sain ha kylleng ki bynta ka Shillong, bad bun na kine ki nongjngohkai kila kyrpad ia ka jingiarap ba kin ioh leit phai suk shala iing.
Kine ki kali kiba sahkut ki kynthup ia ki kali tourist bad ki kali shimet. Ki nongniah kila kyrpad ia ki Pulit bad ia u Myntri Rangbah ka Assam Himanta Biswa Sarma ba un tuklar bad ban iakren bad ki bor Sorkar ka Jylla na ka bynta ka jingioh leit phai suk jong ki sha Assam.
Ka jinglong jingman ha Shillong kala buh ia ki nongjngohkai hapdeng ka jingeh ha kylleng ki jaka jong ka surok Meghalaya-Assam namar ka jingbym long thikna lano ba ka iaid ka ieng ki kali kan long biang kumba ju long.
Kane ka jinglong jingman kala mih hadien ka jingmih ki jingjia thombor ha ka rally thuk thuk ka KSU ba long ha ka sngi Balang, kaba la lam sha ka jingjulor haduh 31 tylli ki kam, pynmynsaw ia 16 ngut ki briew bad kiwei kiwei.
Ka Tnad Jngohkai ka Jylla kala bthah ia ki nongjngohkai bad ki nongwankai ba kin husiar bha bad ban bud ia ki jingbthah ka Tnad haba ki leit shanp shano ha Shillong. Kala pynmih ruh ia ka toll-free helpline, *1800-599-2026*, lada ki donkam ia ki jingiarap ne kino kino ki jingtip.
Ha kajuh ka por, ka jingkynad ka dang bteng ha Jorabat kaba don ha khappud ka Assam-Meghalaya, da ka jingmih paid bah ki nongiakhih ha ka sngi kaba ar hynne ka sngi thohdieng.
Ki nongiakhih kila byrngem ban khang ia baroh arliang ki surok jong ka Highway lada ki Heh Sorkar kim wan dalade sha ka jaka, panmap halor ka jingjia bad ban siew ia ka bai lutksan jong ki kali ba shah pynjulor.
Kane ka jingiakhih kala pynthut biang ia ka leit ka wan ha kane ka surok ba kongsan bha kaba pyniasoh ia ka Assam bad Meghalaya.
