Guwahati, Naitung 18 : Ka higher education directorate ka Assam ka la khot hajir ia ki 70 ngut ki briew ki ba trei kum ki nongiarap (tutors), principal, nonghikai bad ki librarian halor ka jingsuba ba don napdeng jong ki, ki ba ioh ia ka kyrdan PhD ka ba shu thok.
Katkum ka kaiphot la ong ba halor kane ka bynta la thaw ia ka screening committee ha ka ba la thung ia u vice-chancellor barim ka Dibrugarh University, u Prof Alak Kumar Buragohain kum u chairman.
Kine ki riew shimet ki ba la shah khot hajir hakhmat ka directorate ha ka 19 tarik Naitung ki dei ki ba trei ha ki kolej bapher bapher ki ba ioh jingkyrshan jingsiew na ka sorkar.
Lah ban kdew ba ki District-level committee ba la thaw da ka sorkar jylla ka la ai ka jingmynjur na ka bynta ban kyntiew bad pynskhem (regular post) ia ka jingshakri na ka bynta kine ki nonghikai.
“Ki ba bun na kine ki ba la shah khot hajir na ka bynta ban bishar bniah ia ki kot ki sla ki dei ruh ki ba trei kum ki nongiarap. Lada lap ba ki kyrdan PhD jong ki, ki long ki ba shisha, kito ki nonghikai ki ba trei lyngba ka fixed pay, kin ioh ia ka lad ban ioh rung ha ki post assistant professors,” ong ka lad pathai khubor ka ba la shim ia ka jingkren jong u Director higher education, u Dharmakanta Mili.
Nalor kata u la ong ruh ba kan don ka jingkyntiew ia ka tulop lada kin shah kyntiew sha ka kyrdan assistant professor, kata ka ban plie ia ka lynti ha kaba ki lah ban long ki assistant professor hadien habud.
Watla katta na ka liang ka lad pathai khubor ka la ong ba ki ba bun na kine ki dei ki ba la ioh pdiang ia ka kyrdan PhD na ki university shimet bad ki university ki ba ioh ia ka jingkyrshan pisa na ka sorkar ki ba na shabar ka jylla.
