Shillong, Naitung 18 : Ki nonghikai SSA hapoh ka jylla hapoh ka lama jong ka Meghalaya SSA Schools’ Association (MSSASA) ha ka sngi Nyngkong ki la shim ia ka rai ba kin bteng ia ka jingiakhih da kaba shong kyllain myngor hakhmat ka Additional Secretariat Shillong hadien ba ka jingiakren bad ka sorkar kam shym la poi shaei shaei ruh.
Haba kren bad ki lad pathai khubor hadien ka jingkynduh bad u Additional Chief Secretary ka jylla Bah DP Wahlang na ka liang u President ki nonghikai SSA Bah Aristotle Rymbai u la ong ba katei ka rai ba ki shim kadei hadien ba ki nonghikai baroh kim sngew lah shuh ban shah ia ka jingphah ap jong ka sorkar.
“Na ka liang ki nonghikai da kawei ka rai kim hun satia ia ka rai jong ka sorkar na ka bynta ka tulop kaba ki khlem pat siew mynta la 6 bnai naduh u Rymphang,” ong u President.
U la iathuh ruh ba ka tnad Pule Puthi ka jylla ka la pyntip ba ka daw ka jingslem ban pyllait ia ka tulop ba sahteng kadei namar ka dang sahkut ha Finance Department ym ha ka Education Department ban pyllait ia ka tulop kaba poi sha ka 44 klur tyngka.
“Na ka bynta kane ka samoi mangtyngka ka jingslem dei na ka sorkar pdeng bad na ka liang u Additional Chief Secretary u la pyntip ba ka sorkar pdeng kam pat pyllait shi paisa ruh sha kino kino ki jylla ha ka Ri haduh mynta,” u bynrap biang
Haba kren pat halor ka jingdawa kyntiew ia ka tulop u Bah Rymbai u la ong ba u Additional Chief Secretary u la pyntip ruh ba ka tnad ka dang bishar bniah halor katei ka mat namar ka jylla mynta ka dang don ha ka jingtyrkhong pisa.
Ki mat jingdawa ba kitei ki nonghikai ki buh ki kynthup naduh ka jingdawa ban pyllait noh ia ka tulop, ban kyntiew ia ka tulop bad ruh ban ithuh noh ia ki kum ki nonghikai jong ka sorkar jylla.
