Guwahati, Naitung 21: Ki bor pulit ka Assam ki la ioh kem noh ia uwei u doktor Ayurvedic u Pankaj Pathak napoh Berpeta district hynnin ka miet sngi Balang. La kem noh ia une u doktor halor ki jingkynthoh pyrshah ki jong u pyrshah ia kawei ka longkmie trai shnong ka ba shong ba sah ha ka nongbah Guwahati.
Hadien ba u Pathak u la pynmih ia katei ka jingkynthoh lyngba ka social media, kila mih shibun ki jingujor ha ki bynta bapher bapher ka jylla ha ka ba ki la dawa ba dei ban kem noh ia u mardor.
Kumta ruh na ka liang ki bor pulit hadien ba kane ka jingdawa kem ka la nang jur hapdeng ki nongshong shnong ki la pynlong ka jingkhynra ia ka jaka treikam ka jong u ka ba don ha Tihu hapoh Nalbari district hynrei la shem ba une u briew u la phet krad.
Hynrei hynnin ka miet sngi Balang ki bor pulit ki la lapdien ia u Pathak bad kem noh na ki bynta jong ka Howly.
Haduh mynta hi kam pat shym la don kano kano ka jingpynpaw na ka liang ki bor pulit ha ka ba iadei bad kane ka jingjia baroh.
U Pankaj Pathak u la shah kem noh da ka ba pynshong nongrim halor ka hukum ba la pynmih da u Myntri Rangbah (CM) ka jylla u Himanta Biswa Sarma.
