Itanagar, Naitung 21: Ki bor pyniaid district hapoh Kurung Kumey ka Arunachal Pradesh mynta ki la shim ia ka rai ban phah da ki liengsuin helicopter na ka bynta ban wad ia ki 19 ngut ki nongtrei bylla ki ba la jah rngai ha ka thain ba pajih jong ka district naduh ka 5 tarik mynta u bnai.
U Deputy Commissioner ka Kurung Kumey, u Nighee Bengia hynnin ka sngi Balang u la ong ba kin phah ia ki liengsuin helicopter ka IAF ha ka sngi Palei ka ba bud sha katei ka jaka na ka bynta ban wad ia kitei ki briew ki ba la jah rngai, kata hadien ba ka jinglong jingman jong ka mariang ka long ka ba biang.
Kine ki nongtrei bylla ki ba dei na ka jylla Assam ki dei ki ba pyntrei ia ka surok jong BRO na Damin sha Huri.Namar ka jingshem jingeh ha ka jinglong jong ka jaka ba long riat kumta ruh ki kynhun aijingiarap ki shem jingeh shibun ban lapdien ia kine ki briew ki ba jah rngai.
“Kumta ruh ngi la shim ia ka rai ban phah da ki liengsuin ka IAF na ka bynta ban pynlong ka jingwad ia kitei ki briew.Ngi la pan ruh ia ka jingiarap jong ka tnat shipai Indian Air Force.Ka tnat NDRF ruh kan iarap lem ia ka SDRF ha kane ka jingleit wad ia kitei ki nongtrei bylla.Kane ka jingleit kan kynthup na suin bad na ryngkew kumjuh.Ngi la ioh ruh ia ka jingiarap lem jong ki trai shnong ki ba la tbit bad shemphang bha ha ka ba iadei bad ki jaka ba long riat hapoh kane ka thain,” ong u Deputy Commissioner.
Nalor kata u DC u la ong ruh ba ka kynhun ki nongai jingsumar ia ki ba la phah sha katei ka jaka na ka bynta ban pyndep ia ka postmortem ia uwei u nongtrei ia u ba la ngeit ba la lap iap najan jong ka wah Furak hynrei ki ba la wanphai noh namar ka jingbym lapdien ia ka met.
“Ngi la ioh jingtip lyngba ka WhatsApp ba ia ka met iap jong uwei na kitei ki nongtrei la lapdien na ka wah Furak ka ba dei ka shnat jong ka wah Kumey.Hadien kane la phah ia ka kynhun ki doktor sha katei ka jaka na ka bynta ban leh ia ka postmortem. Hynrei hadien ba katei ka kynhun ka la poi sha katei ka jaka kim shym la lapdien satia ia katei ka met iap.Na ka liang ki bor pulit ki la khot hajir ia u briew u ba la kam ba ki la iohi ia ka met iap.Lehse u la shu pynsaphriang ia ka khubor hamsaia.Une u briew u dei na ka shnong Rupai mynta u la jah rngai,” ong shuh shuh u DC.
Ha kawei pat ka bynta, na ka liang u SP ka Kurung Kumey u Abhimanyu Poswal u la kam ba kine ki nongtrei bylla ki la phet noh na ka jaka trei jong ki namar ka jingpynslem ban siew bainong da u sub kontraktor bad namar ka jingbym ioh ia ki jingdonkam ba kongsan hapoh kane ka jaka ka ba ki shong trei.
