Nongpoh, Kyllalyngkot 11: Da ka jingtreishitom ban rad dyngkhong ïa ka jingshalan beaiñ ïa u drok bad ban ïada ïa ki khun samla na ki jingsniew jong u drok, ki pulit ka Byrnihat Police Outpost hynnin ka miet sngi ba-ar, ki la ïoh ban kem ïa u wei u bar jylla u ba dang thmu ban shalan ïa u drok ha ka thaiñ Byrnihat, Ri Bhoi District.
Katkum ka jingtip ba la ïohlum, ki pulit ka Byrnihat Police Outpost, hadien ba ki la ïoh jingtip halor ka jingdon jong u wei u bar jylla na Assam u ba thmu ban pynpoi ïa u drok ha ka thaiñ 13 Mer Byrnihat, mar mar ki la leit pynap shrip bad hadien katto katne por ki la ïoh ban bat ïa u tei u bar jylla ha ryngkat shi synduk sabon ba la thep ïa u drok heroine.
Ïa u tei u briew ba la shah kem la ithuh Suresh Prasad Kanu u ba shong ba sah ha New Guwahati Rly. Colony bad hadien ka jingtalasi na ka met jong u la ïoh ban kurup kumba 10 gram u drok heroine ba la song hapoh kawei ka synduk sabon bad ruh ka pisa kumba 2640 tyngka.
Na ka liang ki pulit, ki la rah noh ïa u ne u bar jylla sha thanat bad la register case ia u hapoh ka kyndon NDPS Act.
