Aizawl, Nailar 29 : Kawei ka nonghikai skul kala shah kem noh halor ka jingkynnoh donkti ha kaba phah iaid lyngkhuid marshiteng ia kawei ka khynnah skul kaba dang hynriew snem rta sha la iing, ong ka khubor pulit.
Ia kane ka nonghikai skul ba la tip kyrteng kum ka Lalbiakengi, kaba hikai hapoh ka government primary school hapoh ka shnong Thangpu shathie ka Lunglei district ka Mizoram la kem noh ha ka sngi Saitjain ba la lah hadien ka jingujor da ka kynhun kaba khmih halor ki lad jingiada ia ki khynnah, ong u SP ka Lunglei, u Rex Zarzoliana Vanchhawng.
Na ka liang ka tnat pule puthi ka jylla ruh kala pan ka jingpynshai na katei ka nonghikai, katba ka kynhun ki seng samla pule kaba halor, ka Mizo Zirlai Pawl (MZP) ruh kala dawa ba dei ban weng kam shisyndon ia kane ka nonghikai.
Katei ka jingjia kala jia hapoh kawei ka skul primary ba la pyniaid da ka sorkar hapoh ka shnong Thangpui kaba hap hapoh Lunglei district ha ka 25 tarik mynta u bnai.
Ka kmie jong katei ka khynnah, ka Nancy Lalnunsangi kala ong ba ka khun jong ka, kaba dang pule ha ka klas I, kala shah pynshitom bein ha uwei u khynnah shynrang hapoh ka skul jong ka ha ka 22 tarik u Nailar ba la dep.
“Ka khun jong nga kala shah shoh haduh ba kan da mynsaw ha u para khynnah klas kat haduh ba kan da prie da ka snam bad shitom na ki bynta jong ka kpoh.Hynrei, watla katta namar ka don ia ka jingthrang ban leit skul da ki unifrom kiba ka la phong ha ka sien kaba nyngkong mynta ka snem, kumta ha ka sngi kaba bud kala leitphai biang sha la skul bad ngat biang ha ka jingshah thombor ha u juh u khynnah,” ong ka kmie.
Kumta ruh da ka jingbitar kala leit sha katei ka skul bad mai tyngeh ia utei u khynnah.Hynrei, tang hadien khyndiat por katei ka nonghikai kala phone sha ka bad kynnoh ba kala pynkhein ia ki kyndon ain jong ka skul da kaba mai tyngeh ia utei u khynnah, ong ka Nancy. Kata ka nonghikai la ong ba kala pynpaw pyrshah ruh wat lyngba ka WhatsApp group, ka la ong shuh shuh.
“Nga la bitar tyngeh bad leitphai biang sha skul ha ka 25 tarik mynta u bnai ban leit shaw iala ka jong ka khun ha ryngkat u para jong nga.Ha kaba kum kane ka por kane ka nonghikai kala wan tuklar bad ong ha nga, lada u dei ban shah ia ka ba kan ialam noh iala ka jong ka khun ka dei ban iehnoh ia ki riam skul namar don kawei pat ka khynnah kaba donkam ia ki.
Kumta ruh kala pynlaw noh ia ki uniform skul hakhmat ki para khynnah skul bad pyllait ia ka ba kan leit tang ka patlun poh, ong shuh shuh ka Nancy.
Ha kawei pat ka bynta u Myntri ka tnat pule puthi ka jylla, u Lalchhandama ula ong ba kila phah da ka jingthoh ban pan jingshai na katei ka nonghikai shi sngi hadien jong katei ka jingjia.Kane ka nonghikai kan hap ruh ban wan mih hakhmat u district education officer mynta ka sngi nyngkong, ula ong.
Da kaba pynshong nongrim halor ki jingpynkhein ia ki hok longbriew manbriew, na ka liang ka MZP kala dawa ba dei ban weng noh mardor ia katei ka nonghikai na ka kam namar kam pat long kaba bit ban bteng kum ka nonghikai skul.
U president ka MZP, u Lalnunmawia Pautu ula ong ba ka seng kan iakynduh ia u myntri ka tnat pule puthi bad ia u director ka tnat education, u H Lalthlangliana ban ai ia ka shithi dawa weng kam ia katei ka nonghikai mynta ka sngi Nyngkong.
