Guwahati, Nailar 29 : Ka tnat Forest ha ka sngi Saitjain ba la lah kala ioh ban kem noh ia san ngut ki briew halor ka jingkynnoh donkti ha kaba iadei bad ka jingshah pyniap jong uwei u khla Bengal (Bengal Tiger) ha ki bynta jong ka Kohora range hapoh Kaziranga National Park.
Katkum ki khubor, ia kine kiba shah kynnoh donkti la tip kyrteng kum u Shyamol Suklabaidya, Hira Munda, Jairam Chaunra, Sanjay Chaunra, bad u Rajesh Gowala kiba la shah kem noh na ki bynta jong ka Shildubi kaba hajan Kohora range jong ka Kaziranga National Park.
Lah ban kdew ba ha ka 28 tarik u Rymphang ba la dep la lapdien ia uwei u khla Bengal bad kawei ka masi kiba la shah pyniap ha ki bynta jong ka Shildubi kaba hajan Kahora range. Halor kane ki bor pulit kila shim ba une u khla ula shah pyniap, bad hadien ba kila pynlong ia ka jingtohkit bad phah leh ruh ia ki test hapoh ka laboratory. Lyngba kane ka jingleh ia ki tes la shem ba utei u khla u la iap na ka jingshah ai bih.
Ha u bnai Jylliew ba la dep, na ka liang ki dkhot ka tnat iada khlaw jong ka Orang National Park bad Tiger Reserve (ONPTR) ha Darrang district kila ioh ban kem noh ia laingut ki runar halor ka jingdonkti ha kaba pyniap ia uwei u khla Bengal uba la san bha hapoh ka park.
Ia kine ki laingut kiba la shah kem la tip kyrteng kum u Ajibur Rahman, Hasmat Ali, bad u Mohammad ML kiba dei baroh na ka shnong Bosa Simalu kaba hap hapoh Borsola Police Outpost jong ka Dhekiajuli Police Station hapoh Sonitpur district.
Kine ki laingut kila shah kem noh na ka jaka rieh ka jong ki ha ryngkat arngut kiwei pat ki paralok kiba la jah rngai noh naduh ka miet jong ka 4 tarik u Jylliew, kata hadien ba ka kynhun ka tnat forest kala pynlong ka jingwad ia utei u khla ba la shah pyniap bad lapdien ia mar shiteng ka met ba la pyut jong u najan ka jaka sah jong u hymmen u Ajibur, u Gajibur, ong ka tyllong khubor ka Tiger Reserve.
