Tura, Naitung 20: Ka jingpynlong ia ka Meghalaya Youth League ha ka sien kaba nyngkong eh, kala sdang hynne ka sngi Saitjain ha madan phutbol Chandmari, Tura. Ka jingïakhun ha kane ka sngi sdang ka long hapdeng ka Tura District Football Association pyrshah iaka Baghmara District Football Association ha ka U-14 Boys (Zone A).
Ka kynhun ki khynnah shynrang jong ka Tura District Football Association kala pynrem iaka Baghmara District Football Association da 13-0.
Ia kitei ki kol la ioh thep da u Wennieber M Sangma ha ka minit kaba 3, 7, 17 bad 67.
Katba u Adeodatus G Momin ula ioh thep ha ka minit kaba 4, u Angchu Derio T Sangma ula thep kol ha ka 19 minit, u Adoweanga R Marak ha ka minit ka ba 31, 34 bad 35 minit. U Luxbirth M Sangma ula thep ia ka kol ha ka minit kaba 63 bad u Chegado Ch Marak ula thep kol ha ka minit kaba 16, 24 bad 60.
Ïa ka Meghalaya Youth League yn pynïalehkai ha ki Zone bapher, ha kaba 4 tylli ki kynhun na ki 4 tylli ki Zone kin ïakhun ha ki jingïakhun kaba la tip kum ka ‘Home’ & ‘Away’ shwa ba ki kynhun ba pawnam kin rung sha ka ‘Knockout Stage’. Ki jingialehkai jong ka Youth League ki long ha kajuh ka por ha ki 8 tylli ki jaka ialehkai bapher bapher jong ki district kiba ha kylleng ka jylla Meghalaya.
Ka Meghalaya Youth League ka don ia ka jingthmu ban long kum ka rynsan ban jied ia ki khynnah ban mihkhmat ia ka jylla Meghalaya ha ki jingiakob kiba long hapoh ka ri. Nalor kata, kan ai ia ka lad ïa ki nongïalehkai phutbol kiba dang rit ban ïoh prat lynti ban poi ialehkai ha ki Club ha ki kyrdan kiba heh bad kaban ïarap ha kaban kyntiew ia ka kynhun ïalehkai phutbol kaba khlaiñ hapoh ka ri.
.){kind=link}