Nongstoiñ, Jylliew 06: U lyoh ba dum u la wan ban kah їa ki paitbah ka hima Raidmynsaw na ka jingkhlad noh jong u (L) bah Hindro Samakha, u nongїalam ba radbah jong ki paitbah u ba dei ruh uwei na ki dkhot jong ka Regional Committee on Border Dispute ba la thung da ka sorkar jylla.
U (L) bah Hindro Samkha u la khlad noh ha ka miet sngi hat majai ka 3 tarik jong une u bnai ha ka їing jong ka para jong u ha Langpih. La tep don burom їa ka met jong u ha ka 5 tarik ha u lum jingtep jong ka Balang Presbyterian Langpih.
Kum ban pynkynmaw ba u (L) bah Hindro Samakha, u la shah jied nyngkong eh kum u Myntri jong ka hima Raidmynsaw ha u Syiem ka hima Rambrai ha u snem 1994. Hapdeng ki jingshah thombor jong ki paitbah Khasi ha ki pulit Assam kiba don ha Langpih, u la їeng skhem triang ban їalam da ka jingїatylli lang kawei khlem da kynran dien.
Ha u snem 2009 ha ka por ba u bah K.P.Pangniang u long kum u MDC ka Rambrai Jyrngam, ka KHADC ka la ithuh їa ka hima Raidmynsaw kum ka hima Sirdar ba thymmai ha bad ka la thung їa u bah Samkha kum u Sirdar. Nalor kata dei ha ka por ba u (L) bah Samakha u long kum u Sirdar, ba ka jingsynreit kuli pathar jong ki pulit Assam ka la jia ha Langpih ha kaba saw ngut ki rangbah Khasi ki la kyllon їap.
Їa ka mokotduma halor katei ka jingshah siat їap la shimti da u Nongbishar jong ka Phukan Commission ha Guwahati bad lyngba ka jingtohkit bad ka jingbishar ba hok jong u Nongbishar jong ka Commission, ki longїing jong ki saw ngut kiba shah siat їap ki la їoh їa la ka jong ka hok bad la pynksan їa ki, ha kaba ka Commission ka la rai pynrem їa ki pulit Assam kiba don kti ha kaba synreit kuli pathar kaba la wanrah їa ka jingїap jong kitei ki saw ngut.
U la bat ruh kum u Chairman jong ka Langpih Bazaar Committee, u Chairman jong ka Raidmynsaw Upper & Secondary School bad kiwei kiwei ki kam. Ym tang katta u (L) bah Samkha u la long kum u nongїalam jong ka hima, u don ka jingїadei kaba jan bha bad ki sorkar kiba synshar їa ka jylla, ki bor pynїaid district jong ka West Khasi Hills, ki ophisar jong ki tnad trei kam bapher bapher bad lyngba ka jingtrei shitom jong u ryngkat ka jingїatrei lang jong ki nongsynshar shnong bad ki paitbah ka la wanrah shibun ki jingkylla ha ka thaiñ.
Ka jingkhlad noh jong u ka la long shisha ka jingduh kaba khraw ym tang їa ki paitbah ka hima Raidmynsaw, hynrei їa baroh ki nongsynshar shnong bad ki riew rangbah kiba ju їatreilang ban wanrah їa ka shongsuk shong saiñ, ka jingїalong kawei hapdeng ki nongshong shnong ha katei ka thaiñ.
