Jowai, Jylliew 06 : U Symbud Myntri Rangbah ka Jylla bad Chairman ka Regional Committee on Interstate Border ka Ri-lum Jaintia Bah Sniawbhalang Dhar, hynne ka sngi ula lum ia ka jingialang bishar kam halor ki jingmih ki shnong ba dang don ka kynrum kynram ha ka MoU haba phaikhmat ia ka jingkynthup noh ia ka shnong Baikam sha Meghalaya.
Ia kane ka jingialang la pynlong ha shnong Ratacherra bad kiba la iadonlang ki kynthup ia u Deputy Commissioner ka East Jaintia Hills Shivansh Awasthi, Superintendent of Police Giri Prasad, SDO (Sadar) M Kumar, u BDO ka Wapung C&RD Block M Kyndeit, ki Rangbah Shnong ka Baikam, Ratacherra bad Malidor nalor ki nongshongshnong ka Baikam.
Haba kren sha ki nongthoh khubor hadien ka jingialang, u Symbud Myntri Rangbah ula pynpaw ba kane ka jingialang ka long kaba seiosh bha. Ula pyntip b aka shnong Baikam ka kynthup ia 37 tylli ki Longiing ha kaba haduh 30 tylli kila pynpaw ia ka jingkwah ban don noh ha Meghalaya.
Ula pyntip ba ka jignialang kala ai ia ka rynran kaba kongsan ia ka Regional Committee bad ki nongshongshnong ba kin iakren halor kane ka kam.
U pyntip u Deputy Commissioner ka East Jaintia Hills bad ka Cachar (Assam) kin sa iashong ia ka jingialang shen ban pyn tyllun shakhmat ia ka jingiakren.
U iathuh ba hadien kane ka jingialang, u Deputy Commissioner ka EJH un sa pynkhreh ia ka kaiphod kaba bniah bha, ban sa aiti sha ka Sorkar Jylla ba kan leh ia kaba donkam.
Haba kren halor ki skhim pynroi ha ka thain, u Symbud Myntri Rangbah ula pyntip ba ki nongshongshnong ka Baikam ia mynta kila ioh ia ki jingmyntoi na baroh arjylla-ka Meghalaya bad Assam. Ula pyntip ba ka rai ba khatduh ka long kaba donkam bha ban lah pynbeit ryntih ia ka jingioh ia ki skhim Sorkar bad ban pynthikna ia ka jingshakri kaba paka.
Ha kajuh ka por, u Deputy Commissioner Shivanch Awasthi ula pyntip ba ki jingialang bad ki bor na Assam kila dep long la bunsien kynthup ia kawei bad u Deputy Commissioner ka Cachar, kaba la pynlong ban pynbeit ia ka jingpynisoh ia ka shnong Baikam.
