Shillong, Naitung 12: U Myntri Khynnah ka Tnad Petroleum and National Gas bad Labour and Employment u Rameswar Teli hynne ka sngi ba ar ula sam ia ki Ujjwala 2.0 LPG free Connection, ka E-Shram bad PM-SYM Card, PPO bad Cheque jong ka EDLI Scheme, ki ESIC Card sha ki nongshong shnong ka Jylla Meghalaya ha ka jingialang ba pynlong ha Shillong Club.
Haduh 10 tylli ki Longiing na East Khasi Hills District kila ioh ia ka free LPG Connection. U Myntri u pyntip ba haduh 62% la pyndep ia ka Ujjwala scheme ha Jylla Meghalaya bad kyrpad ia ka Sorkar Jylla ban nang trei shitom ha kaban lah kynjoh noh kloi ia ka 100 %.
Haduh 11 ngut ki briew ki la ioh ia ka Pension Payment Order (PPO) kum shibynta jong ka skhim PRAYAS na ka bynta ka Azadi Ka Amrit Mahotsav 2022. Hapoh ka Under Employees’ Deposit Linked Insurance Scheme, 1976 (EDLI), ki nongioh jingmyntoi kila ioh ia ka cheque ba T. 7 lak na ka bynta 5 ngut ki Dkhot ka Iing kaba long mar T. 1.4 lak. 10 ngut kila ioh ia ka E-Shram Card bad 5 ngut kila ioh ia ka PM-SYM.
U Myntri Khynnah haba kren halor ka Ujjawal Yojana, ula ong ba kane ka skhim kala kyntiew bha ia ki longiing kiba ha Nongkyndong kiba ju pyndonkam ia ki rukom shet rukom tiew da ka dieng, ka stove umphniang sharak, dewiong, rnga eit masi bad kiwei kiwei. U ong ba kane kala ktah jur ia ka koit ka khiah jong ki Kynthei bad ki Khynnah ha ki jaka nongkyndong bad ktah ruh ia ka mei mariang.
U Myntri Khynnah u ong ba ha ka jingialam jong u Myntri Rangbah Duh ka Ri u Narendra Modi, ka Ministry of Petroleum bad Natural Gas, kala lah ban wanrah ia ka skhim Pradhan Mantri Ujjawala Yojana da ka thong ban ai sha ki paidbah ia ki tyndong lyer shet jingshet. U ong ba palat 9 klur ki kynthei kila ioh ia ka LPG Connection ba ai ei da ka Sorkar Pdeng.
U Myntri u pyntip ba ka Ministry jong u kan sa pynlong noh shen ia ka exploration ne ka jingwad ia ka par umphniang bad ka natural gas ha Meghalaya nalor kiwei kiwei ki Jylla ka thain shatei lam mihngi. U pyntip ba shen ka Sorkar Pdeng kan sa pyntreikam ruh ia ka project ban pyniaid ia ka gas pipeline ha baroh ki Jylla jong kane ka thain bad ha Meghalaya kan pynpoi haduh ka Nongbah Shillong.
U Myntri Khynnah ula kren ruh halor ka Labour Laws, ka jingtreikam ka EPFO haba pyntip ba haduh 60 lak ngut ki Nongshongshnong ka ri kila jingmyntoi na kane ka skhim kaba kot haduh T. 5500 klur. U la kren ruh halor ka Employees State Insurance Scheme of India (ESIC) bad ka E-Shram haba pyntip ba haduh38 klur ngut ki nongshongshnong kila dep register ialade ban ioh ia ki skhim nongbylla na ka Sorkar Pdeng.
