Shillong, Naitung 12 : U Myntri Rangbah ka jylla Conrad K Sangma ha ka sngi ba-ar u la pynbna ba ki shnong kiba hap ha ka Census Town mynta kin ioh lang ia ki jingmyntoi kiba wan na ka skim 100 sngi ne ka MGNREGS.
Overjoyed to launch the implementation of MGNREGA in Census Towns of Meghalaya. Grateful to @PMOIndia & Union Minister of @MoRD_GoI, Sh. @girirajsinghbjp Ji for extending the benefits of MGNREGA in non-rural areas of the State. pic.twitter.com/2NFd6iggoL
— Conrad Sangma (@SangmaConrad) July 12, 2022
Ia kane u Myntri Rangbah u la pynbna ha ka jingialang kaba long ha State Convention Centre ha ryngkat ka jingdonlang u Myntri ka tnad C&RD, Bah Hamlet Dohling nalor u Principal Secretary, C & RD, Sampat Kumar.
Haba kren ha kane ka jingialang, u Myntri Rangbah u la pynpaw ka jingsngewnguh ia ka sorkar India lyngba ka Ministry of Rural Development kaba la shimkhia halor katei ka bynta ban weng noh ia katei ka jingeh kaba rit hynrei kaba la neh slem slem bha.
“Baroh shi katta ki Census Town kim shym la ioh jingmyntoi ei ei la ka long na ka tnad Pynroi Sor lane naka tnad Pynroi nongkyndong bad kumta ki la duh shibun ki kam pynroi,” u la ong.
U la iathuh ruh ba ka sorkar India ka la dep ruh ban pynshai ba ka MGNREGS kan treikam ha ki shnongkyndong bad namar ba ka census town kam shym la paw kum ka Urban ne Rural lane Cantonment, kumta ka MGNREGS ka lah ban treikam wat ha ki census town ruh. “Da ka jingkmen kaba khraw nga ieng hangne ban pynbna ba ki census town ruh mynta kin ioh lang ia ki jingmyntoi na ka MGNREGS”.
U Myntri Rangbah u la ong ruh ba ka Meghalaya hi ka la treikam bha ha ka MGNREGS bad ki jingmyntoi kiba ioh na kane ka prokram ki la dei ban poi shuh shuh kham pura sha ki nongshong shnong. “Ngi ruh kawei na ki jylla ban don ia ki longkmie haduh 15 persen ha ka committee ban peit ia ka MGNREGS bad mynta ngi la don haduh 2,500 ngut ki secretary kynthei ha ki VEC bapher bapher bad kane hi ka pyni ia ka jinglong mar ryngkat ha ka rukom treikam bad shim rai naduh ki shnong ki thaw,” u la ong.
Ha kane ka sngi la donlang ruh naduh u Bah Pyniaid Singh Syiem, MLA, Mawryngkneng, Balajied Kupar Synrem, MLA, Shella, P T Sawkmie, MLA, Mawlai, Gavin Miguel Mylliem, MLA, Sohra, Titosstarwell Chyne, CEM, KHADC bad Teibor Pathaw, MDC, Mawlai nalor kiwei kiwei.
