Guwahati, Naitung 30 : Kawei ka tymmen 85 snem rta ka ba kham hashwa ka la shah pynbna kum ka nong India lyngba ka Foreigner’s Tribunal court, ka la ioh pdiang biang ia ka jingthoh ban pynshisha ia ka jinglong nongshong shnong ka jong ka sa shisien pat.
Kane ka briew ba la tip kyrteng kum ka Bhanumati Baroi ka dei ka ba shong ba sah ha ki bynta jong ka Boko hapoh Kamrup district bad la kynnoh ba ka dei ka briew ka ba na shabar jong ka ri ha ki bor pulit iada khappud.
Namar ka jinglong jingtymmen bad ka jingban ka jingshitom nalor ka jingshitom ha shiliang ka kjat, ka Baroi kam lah bha ban iaid ban ieng da lade hi. Ha ka snem 1998, ki pulit ki la pynmih ia ka ba kum kane ka juh ka jingkynnoh pyrshah ia ka Bhanumati.
Ha kane ka kynti ka ba mynta, ka la wan mih hakhmat ka Foreigner’s Tribunal court ha ka jylla bad pyni ruh ia ka kyrteng jong ka ha ka list jong ki nongthep vote jong ka snem 1965 bad 1971, ha ka ba la kdew ruh ia ka kyrteng u kpa jong ka.Nalor kane ka la pyni ruh ia ki syrnod ba la ioh na ki nongialam shnong bad kiwei pat ki kot ki sla ban kyrshan ia ka jingkam ka jong ka ba ka dei ka nongshong shnong ba pura jong ka ri India.
Ha ka snem 2001, ka Foreigner’s Tribunal court ha Nalbari ka la pynbna ia ka Bhanumati kum ka nongshong shnong jong ka India hynrei hadien 21 snem, ki bor pulit sa shisien pat ki la kynnoh ia ka ba ka dei ka bar ri ha ka ba ki la phah jingthoh sha ka iingsah jong ka lyngba ka Boko Chomoria police station.
Ka Bhanumati ka dei na ka shnong Jashedarpam hapoh the Barpeta district.Hadien ka la kynriah noh sha Boko hadien ba ka la pyndep ia ka jingiathoh shongkurim bad u Gopal Baroi u ba dei na ka shnong Trilochan ha ka thain the Boko. Kane ka briew ka don arngut ki khun shynrang.
Na ka liang u Sanjoy Sarkar, u ba dei u president jong ka All Assam Bengali Parishad Kamrup district u la ong ba kane ka longiing ka im hapdeng ka jingduk bad ka jingeh ka la nang ban shuh shuh hadien ba ki la ioh pdiang dang shen ia ka jingthoh na katei ka tribunal.
Nalor kata u la kam ruh ba ba kyrteng jong ka Bhanumati ka don hapoh ka National Register of Citizens (NRC) bad ba ka la pyndep ha ki jingiathep vote la bun bun phew sien.
Ha kawei pat ka bynta na ka liang u working president ka Congress ha Assam u ba dei ruh u MLA u Kamalakhya Dey Purkayastha u la pynlong ka jingleit jurip ia ka iingsah jong ka Bhanumati bad kynthoh tyngeh ia ka seng BJP.U la kynnoh ba watla ka BJP ka la kualr ban pynthikna ia ka jinglong nongshong shnong na ka bynta ki Hindu Bengali, hynrei ki jingshisha ki long mar khongpong.
