Guwahati, Naitung 30 :Ki bor pulit ka Golaghat ki la kem noh ia ki shijur halor ka jingkynnoh donkti ha ka ba thombor ia ka khynnah trei ka ba dang hapoh rta naduh kine ki saw bnai ba la dep.
Ia kane ka jingjia la ujor hapoh Moranhat Police Station ha ka 28 tarik mynta u bnai.Ia kine ki shijur ki ba la shah kem la tip kyrteng kum u Nirupam Das bad ka Pinky Saikia.Katkum ka kaiphot ki pulit la ong ba kane ka lanot ka dei ka ba la tip kyrteng kum ka Junali Munda ka ba la leit ban ujor hapoh Moranhat Police Station ha ka 28 tarik mynta u bnai.
Kane ka khynnah ka dei ka ba iarap kam ha katei ka longiing mynta lah kumba shi snem ei ei, hynrei kane ka lanot ka la kam ba ka la bteng ban ngat ha ka jingshah thombor naduh kine ki saw bnai ba la dep.
Hadien kane na ka liang ki bor pulit ka Golaghat ki la pynlong ka jingthwet ia kitei ki shijur ha ki bynta ka Chandan Nagar bad kem noh ia kine ki arngut ki ba la don hapdeng ka jingphet rieh hadien katei ka jingshah ujor.
Kawei na kine ki ba la shah kynnoh donkti, ka Pinky Saikia ka la kyntait halor kine ki jingkynnoh da ka ba ong ruh ba kane ka kam ka kam iasylla.U Nirupam Das u dei u heh ba dei khmih hapoh Sonari Tea Board katba ka Pinky Saikia ka dei ka ba trei hapoh Demow Sericulture department.
Ia kine ki shijur la aiti noh sha ki bor pulit ka Moranhat na ka bynta ban bteng shuh shuh ia ka jingtohkit.
