Shillong, November 26, 2023: Ka Assam Rifles hynne ka sngi kala pynlong iaka Half Marathon kum shi bynta ban wanrah iaka jingiatylli hapoh ka ri bad ka jingrakhe iaka “Fit India Movement”.
Ha kane ka lympung iamareh, ki khynnah kynthei bad shynrang kiba la kynjoh 18 snem ka shaneng haduh kiba la heh la san kila wan iashimbynta.
Ha kane ka jingiakob ha ki kyrdan ki bapher, la wan ban iashimbynta da ki riewpaidbah, ki shipai bad ki pulit rygkat bad ki bahiing bahasem ki jongki, kiba kynthup ia ka Assam Rifles, 101 Area, Eastern Air Command, CRPF, CISF, SSB bad Meghalaya Police.
Ia kane ka jingmareh la phiah ha ki ar bynta ka jingmareh kaba 21 Km bad kaba 10 Km ha kaba ki nongmareh ha ka 21 Km ki don 747 ngut bad 694 ngut ha ka 10 Km.
U Lat ka jylla u Phagu Chauhan kum u Kongsan ula sam ia ki khusnam bad ia ka song tynga sha ki nongjop, ha ka jingialang kaba la long ha Headquarters jongka Directorate General Assam Rifles, Laitkor, Shillong.
Ha ka U-30 u Emphius Nongrum ula rah ia ka nam lahduh ha ka jingmareh ha ka 21 Km bad ka Kong Bandasharai Marwei kala long ka lahduh ha ka liang ki kynthei.
Ha ka jingmareh kaba 10 Km u Bah Iohborlang Nongspung ula long u lahduh ha ka liang ki shynrang katba ka Kong Marqueenless Ramsiej kala long ka lahduh ha ki kynthei.
